YouTuber leh Media Ethics

Mizorama YouTubers-te pualin social media-a thu thar theh darh leh an thil chhuah chungchanga fimkhurna tur leh a kaihhnawih awm theite zir hona chu nimin khan Directorate of Information & Public Relations huaihawtin Lianchhiari Run, I&PR Conference hall-ah neih a ni a. Hetianga DIPR-in programme tangkai tak mai a buatsaih thei hi thil lawmawm tak a ni.
Social media pawimawhna hi kan hriat chian a, kan hman thiam a, kan hman dik phawt chuan, khawtlang siam tha thei tu, hnam nun zia leh mizo tawng humhalhtu a ni thei a, sawrkar khalh ngiltu pawimawh tak a ni thei bawk.
Chutih rualin, social media hi kan hman thiam loh a, kan hman dik loh chuan, a letling thawkin kan ‘chhiatpui’ thei thung; hei hi social media pawimawhna lai tak pawh a ni awm e.
Kan hriat angin, tunhma chuan media tih tawngkam chauh hi hriat a ni thin a. Media hrang hrang heng – lehkhaa chhutkai chi ‘printed’ (daily newspaper & periodicals) te, boruaka thawn chhuah chi radio te, a lem nena thawn chhuah chi TV leh, a hnu deuhah Cable TV te kha media tih khan a huam a. Democracy ramah chuan media hi ‘Fourt Pillar tia vuah a ni nghe nghe a, “Freedom of the Press” tih tawngkam leh, India Danpui Article 19(1)(a) ‘Freedom of Speech and Expression’ tih pawh media lama inhmangte chuan innghahna bera neih thin a ni.
Tunah chuan khawvel thiamna leh hmasawnna avangin social media tih tawngkam a lo piang ta a; tu te pawh mai hi thuthar thehdarhtu kan ni thei ta vek mai a ni ber. Chutih rualin, media lama inhmang bik (sawrkar hriatpui ‘accredited journalist’) ten an zawm ngei ngei tur ‘Journalism Ethics’ kha a mimir tan hriat vek chi pawh a lo ni lova, a dik a dawk pawh thlu lem lovin, kan ar khawthim dai bawrh bawrh tlang ta a ni ber awm e.
Chumi karah chuan, YouTube hmanga thu thehdarhtute an lo pung chho zel a, media ethics hre lem lova hmazawn ami hmuh apiang thehdarh pawp pawp mai chi te pawh an lo awm ta a. Hei tak mai hi tuna DIPR lamin sensitization programme an buatsaih chhan pawh niin a lang.
Social media avang hian mi tam takin printed, radio leh TV lam an hnualsuat phah a. Mahse, hun a han kal leh deuh a, belhchian dawl zan lo, mi mit lakna tura thu mak pui pui tawktarh ching an lo awm a, mipuiin a content an han belhchian hnuah an rin ang a lo ni leh si lo thin a, chutih rualin ‘defamation case’ a tam phah a, FIR te a ri ta nuaih nuaih a, tun hi kan lo thleng ta a ni.
Chem hriam tak kan hum fer fur a, a hman Dan hi kan inzirtir that a, khuahkhirhna Dan kan kenkawh that loh chuan, kan insat pem pheng phung mai dawn a, tan kan lak tlan a pawimawh hle a ni.