ZALENNA

JC.Zoremi Hmar Joute

Zalenna kan teh dan, kan ngaihdan leh thlir dan a inang vek kher lovin a rinawm a. Zalenna han tih hian ram awptu laka zalenna te, sal tâng zalenna leh mimal zalenna te a huam vek a, tuna kan thlûr bing tur chu mimal, tisa leh thlaraua zalenna hi a ni dawn a ni.
Kan lo piang a, kan nu leh pa tur te, kan seilenna turah te, min enkawl dan turah te duh thlang thei kan ni lo va, min siamtuin kan tan a ruat ang angin kan nungin kan awm mai a ni. =henkhat nu leh pa chu strict tak, khawng taka tu leh fate enkawl chi an ni a, kei ngei pawh hi khauh taka enkawlna hnuaia sei lian ka ni. Mi tih ang tam tak kan ti ve thei lo va, concert-naa kal te, picnic leh hlimhlawp bawlnaah te kal phalsak ka ni ve ngai lo va, khâng hun laia naupangin nuam kan tih ber mai riah khawm leh chaw ei khawm te, lui kal leh kan nuam tih zawng tam tak kha chin tawk neia phalsak leh, ka duh ang anga awm khapsak ka ni a, zalen lo niin ka inhria a, hrehawm ka ti thin em em mai.
Kan han tleirawl a, hun awl neih ve angah pawh pawn chhuah ngai thilah chuan ka nu leh pate an strict em em a, Jail lianpuiah ka tâng ni hawt khan ka hre thin. Ka pa min fuih dan lah chu, “Kum 30 in tling ang a, tuna ka enkawl danah cheu hian lawmthu min la hrilh ngei ngei dawn a ni,” tih kha a ni bur mai a, chawlh ni tlaiah te han leng chhuak ve bawk mah ila, ka haw veleh meizial ka zu ru em, a rim ka nam em tih te, kuhva ka ei em tih hriat nan te min hnimin ka kâ min àntir thlap thin bawk a, thinrim rilru teuhin ka âng leh phuau thin! Aizawl lam atangin zaithiam te an lo kal ve a, tualchhung mite nena inkawpin concert te buatsaih a ni ve thin a, kan khaw Hall lian ber, ‘Jubillee hall’ kan tih maiah an ri bûng bûng a, an thawm hre phak ve vek siin, kal ve thei si lovin kan awm bik thin kha a ni a, bei a dawng a, mit leh beng châknain min luah khat a, kan châk zawng leh nuam tih zawng ti ve thei lova kan awm khan nu leh pa min huattirin hrehawm kan ti a, zalen lo niin kan inhre thin.
Nula kan han ni ve a, inkhawm leh khawhar ina kal te, mitthi lumena kal leh YMA hla zir tih vel kha pawn lama hun kan hman theih chu a ni leh mai a. Nula ve ta chuan inleng te kan han nei ve a, ka pa hian inleng kawm dan tur te, an haw dawna thlah dan tur nen lam min hrilh thin a, tun hnua ka ngaihtuah hian ka pa sawi ang tak takin, ‘ka lo va han vannei tak em’ ka ti ta fo mai. Mahse a hun lai kha chuan ka nun kha a chêp tak zet a, chhuahna tur pawimawh ka neih pawha hunbi thliarsak thlap, haw hun dâr zat tur tuksak thlap ka ni tho mai a, ka nun kha a zalen lova, thaw a pikin nun nawmna kan tem zât tluk zetin nun ninna khan min luh ve fo mai a, ka zalen lo a ni.
Pasal kan han nei ve ta a, naupang tê, kum 18 leka nei ka nih avang khan nachang hriatna te, in chhunga mo fel tak nih tum nachang te kha ka la hre mang lo achhá a ni; ka pasal leh a chhungte hi an fel hrim a, ka la naupan em avanga ka thil tih âtthlak tak tak te, ka tlin lohna tam tak lakah an mit leh beng chhu ngawngin min dawm thiam em em thin a, ka lawm ngawt mai. Mahse, hun a lo kal a, mi tih ang tih ve châkna te chuan pasal nei tawh mah ni ila min rûn ve leh fo mai. Ka châk zawng tam tak chu (ka tân a tha lo tur tih hre hek lo vi!) tih min han phalsak lo leh ngei a, duh hun huna len te, bazar leh ka nuam tih zawng apiang ka ti thei ta lo emaw tih turin ka awm leh ta tho va. Nu leh pa ina awm lai atanga vawiin thleng hian zalen lo niin ka inhria a, hrehawm ka ti thin em em mai.
Ti hian, keiin zalenna ni-a ka hriat chu ka nuam tih zâwng ûm a ni deuh ber angin a lang ta. Zalenna tak tak chu ka thinlungah zawk hian a awm a ni tih ka hriatthiamna hi a la rei miah lo! Pâwn lam nawm chenna chauh kha emaw zalenna ka tih avanga hringnuna lungawi lo phiangsen hian, ka zalenna tak tak Isua neitu ka nihna hi ka lo theihnghilh hmin hman thelh a lo ni a! Sual bawihah ka tâng lo va, hriselna tha tak ka nei a, ka hna duh zawng ka thawk thei bawk; chu mai a ni hleinem, ka naupan lai atanga ka tum leh châk em em, Lehkhabu pawh pathum lai ka chhuah tawh asin!
Tisa nawmna thlakhlelh avanga sal tâng anga inngai a, zalen lo ni-a inhria in awm ve chuan hei hi ka sawi duh. Lal Isua neitu aia zalen famkim hi an awm lo tih hi. Kan Bible thianghlimin a sawi kha. “Tin, Lalpa chu thlarau a ni a, Lalpa thlarau awmna apiangah zalenna a awm thin,” (II Korinth 3:17) tiin. Lalpa thlarau awmna, a chenpuina kan nih phawt chuan zalen kan ni. Khawvel thila kan châk zawng te, kan duh zawng apiang hi kan tan a tha vek kher lo va, Pathian nena kan inhnaih theih lohna thil phei chu châk reng reng lo tur kan lo ni zawk tih hi ka va’n chiang ta êm!
Nu leh pa lakah kan zalen lo emaw, kan hna thawhnaa kan hotute lakah kan zalen lo emaw, kawng hrang hranga zalen lo riau ni-a kan inhria a nih chuan tawngtai ila, kan Pathian hian zalen dan dik leh tha min hmuhtir ngei ngei a ni tih hi i vawng tlat ang u, Thlaraua zalen nih aia zalenna dik leh ropui, hlu bawk si hi khawvelah hian a awm reng reng lo a nia. Zalen ang che…mahse Lalpaah ni rawh se! Amen.