Nuclear chungchangah US-Iran inbe dawn

Nuclear chungchangah US-Iran inbe dawn
US leh Iran chu nuclear chungchanga inremna thar sawi turin Inrinni hian ‘hmaichhanah’ an inbe dawn tih President Donald Trump-a’n a sawi.
He thu a sawi hnu lawkah hian Iranian foreign minister chuan Oman-a an inbiak tur hi ‘mi dang kaltlang’ a nih dawn thu a sawi a; mahse, ‘enchhinna atana remchang tak’ a nih thu a sawi thung.
Trump-a hi kum 2015 khan thuneihna a chan hmasak laiin Iran leh ram chak dangte nen nuclear-a inremna an neih atangin a inhnukdawk a. Tun tuma an inbiak tur hi ‘level sang tak’ a nih tur thu leh a hlawhtling lo a nih chuan Iran dinhmun chu ‘a hlauhawm thei hle dawn’ tih a sawi.
Trump-a’n Iran-in nuclear ralthuam a nei tur ven nan leh US sipaite a laka an chet mai loh nan Iran biak a duh thu a sawi hnuah thla hmasa khan Iran hian mi dang kaltlanga inbiak a theih thu a sawi.
Trump-a hi White House-ah Iranian nulear hmun beih tuma vautu dang, Israeli Prime Minister Benjamin Netanyahu nen an inkawm zawhah Tehran nena inbiak tur hi a puang a ni.
Iran hian a nuclear sawngbawlte chu a him tih a sawi a; mahse, kum sarih liam taa US-in a hrekna ang hrek thar leh theih turin inremna bawhchhiain thil a ti nia rinhlelhna a awm a. Iran hian bomb tam tak siam theihna tur uranium a khawl a ni.
Thawhtannia Oval Office-a thu a sawiah Trump-a chuan, “Iran nen hian hmaichhanah kan indawr tan tawh a, Inrinniah inbiak a ni dawn a. Inkawmna pawimawh tak a ni dawn a, eng nge lo thleng kan la hria ang chu,” a ti.
A hnuah Trump-a hian, “Iran hian nuclear ralthuam a nei thei lo va, chu chu a hlawhtling lo a nih chuan an tan ni duhawm lo tak a ni thei ang,” a ti.
A hnu darkar eng emaw zatah Iranian Foreign Minister Abbas Araghchi chuan Inrinniah Oman-ah ‘indirect high level inbiakna’ a awm tur thu a sawi ve nghal a. “Enchhinna remchang tak a ni a, America kutah thil chu a awm vek a ni,” tiin X-ah a tar lang.
Thawhlehni tukah khan Iran-a sorkar enkawl, Tasnim news agency chuan Araghchi leh Trump-a Middle East special envoy Steve Witkoff chu ‘mi dang kaltlanga an inbiak’ tur thu a tar lang.
US leh Iran hi hun rei tak atanga inngur tawh niin kum 1979-a Islamic Revolution atang leh Tehran-a US embassy beih a nih atang phei chuan an inbe thei lo.
March khan Trump-a hian United Arab Emirates kaltlanga lehkha thawnin inbiak a duh thu a thlen a. Iranian Supreme Leader Ayatollah Ali Khamenei-a’n lehkha a hmuh chuan inbiak chu a hnawl nghal.
Thla hmasa tawpah khan Iranian president chuan Khamenei-a hian Trump-a hi Oman kaltlanga chhangin mi dang kaltlanga inbiak chu a theih thu a hrilh tih a sawi ta thung.
Iran-in nuclear ralthuam a siam loh hi US leh a thawhpui ramten an duh ber pakhat a ni a. Iran hian nuclear programme a neih chu bomb a siamna tur nia ngaiin US, EU leh UN chuan kum 2010 khan an hrek zui ta nghe nghe.
Kum 2015 khan Iran hi US President Barack Obama-a sorkar bakah UK, France, China, Russia leh Germany nen inremin nuclear a sawngbawl tur chin leh International Atomic Energy Agency (IAEA)-in an endik thin a remti.
Kum 2018 khan Trump-a chu he inremnaah hian inhnukdawkin US bikin a hrekna pawh a kalpui thar leh.
IAEA chuan February khan Iran hian uranium kg 275 dawn kawlin 60%-a thianghlim a ni a, ralthuam tluk thuak a nih thu a sawi a. Hei hi a sawngbawl leh duh chuan 90%-ah chhuahin nuclear bomb paruk siam theihna a ni.