Zalenna sual laia hnam sipaite intawkkhawm

Zalenna sual laia hnam sipaite intawkkhawm
Mizoram independent puan Diamond Jubilee lawmna kal zelah Ex Mizo National Army huaihawtin zalenna sual laia hnam sipaia tang tawhte pualin Ningani khan intawhkhawm a ni a. Hnam sipaia tang tawh leh an nupuite an tel a ni.
MNF-in zalenna a sual laia army chief, Brig. Gen. Tawnluia chuan a hmanpui a. Kum tam tak kaltaah khan Pu Laldenga kaihhruaiin zalenna an puang a. Independent an sual lo, tia sawi thinten an hresual a, thudik lo an sawi thin tih a sawi.
“Zalenna kha chiang takin kan sual a, kan martar pui a ni. Army chief-ah kum 8 ka awm ve a, silaimu leh ral karah hun kan hmang a. Martar tam tak an awm bawk. Kan theihna zawng zawngin Zoram zalenna atan kan thawk a, kan inpe a ni,” a ti.
Mizo hnamin zalenna sang ber a neih theihna tura bei a, mahni kea he hnam a din theihna tura beitu zawng zawngte zahna chibai a buk thar tih Tawnluia hian a sawi a. Martar-te thisen hlut zia an hrereng tih a sawi.
“Zalenna sual laia beitute bakah sipai sawisak leh hliam tuar, in hal sak leh sawikhawm tuar, hnam sipai tana lo thawk tawh leh lo pui tawh zawng zawng chungah lawmthu kan sawi a. Khawvel hmun hrang hranga Zohnathlak leh hmun hrang hranga awmte lawmthu sawina chibai kan buk a ni,” a ti.
Independent puan atangin India leh khawvelin Mizo hnam a hriat phah a. Zalenna sual nachang hre hnam, mahni dikna atana bei ngam hnam kan ni chu hnamdangin min zah phah hle niin MNF hruaitu hian a sawi. Thangtharten nationalism chhawmnung zel se a duh tih sawiin, remna leh muanna neih theihnana nawrtu thekhatin ‘MNF an in surrender’ tiin an sawi leh si tih a sawi bawk.
“MNF kha kan in surrender loa, kohhran leh mipui ngenna leh nawrna avangin India nen inremna kan siam mai a ni,” a ti.
MNF-in zalenna a sual laia lieutenant, Mizoram Home minister hlui Lalchamliana pawhin kum 1966-a ram leh hnam an hmangaihna kha a nasa em em a, an nunna chu ram leh hnam tana hlan turin an inpeih at tih a sawi.
“Ram leh hnam hmangaihna kawngah ‘Spirit of 1966’ kha thangtharteah lo thar leh se ka duh hle. Zalenna kan sual khan kan ta lo tur kan dil a ni lo a, kan ta min neih sak neih let leh tumin kan bei a ni. Zalenna kan sual kha kan tisual loa, mipui remtihna thlapa sual kan ni,” a ti.