Zalenna sualchhuaktute duhthu sam ram siam turin tang zel ang – Larsap

Zalenna sualchhuaktute duhthu
sam ram siam turin tang zel ang
– Larsap
Ram zalenna sualtute tawrhna leh duhthusam ram siam a, intodelh leh mahni kutkea ding thei ram ni tura hmalakna a puitlin theihnan theihtawp chhuah turin larsap chuan Zoram mipui a chah.
Larsap Gen. Vijay Kumar Singh (Retd) hian vawiin – August 15 Independence Day thuchah a siam a. India zalenna ni vawi 79-naah Mizoram mipui chibai bukin, “Zalenna kan neih theihnana theihtawp chhuahtute tawrhna leh inhlanna kan ngaihluin kan hrereng a ni,” a ti.
India-in harsatna a tawh changin chak tak leh huai taka dingin a paltlang fo tawh a, tunhnaia Pahalgam Jammu & Kashmir-a mi firfiakte chetna rapthlak takah pawh a lantir tih a sawi. Firfiakte kut tuara thite kan hriatrengna atan tharum thawhna ang chi reng reng beih let kawngah tha thlah loa beih zel tum a ni tih a sawi a ni.
Ram thenkhatin sumdawnna kawngah India hrek tumin hma an la mek tih Gen. Vijay Kumar Singh (Retd) hian a sawi a. Khua leh tui tha kan nih angin kan ram thil siam chhuah hmang ngeia intodelhna ‘Atmanirbhar Bharat’ puitlin thei turin kan ram policy duante tha taka zawm a tul, tiin, khawtual thilsiam ngei hman uar hian ram sum leh pai dinhmun a siamtha a, intodelh tura hmalakna a chawilar tih a sawi.
India rama ziak leh chhiar thiam vekna state hmasa ber dinhmun Mizoram-in a hauh chu a lawm tih sawiin, “Thiamna leh hmasawnna kawnga kan tanrualna rah liau liau a ni a. He hlawhtlinna hi zirna kawnga hmasawnna chak leh tha nei turin chhawmnung zel ila, kan zirlaiten kawng hrang hranga hlawhtlinna an chan a, khua leh tui tha leh a ngaihna hria hruaitu, kan ram hmabak hriltu pawimawh tak an nih theihnan tan la zel ang u,” a ti.
Ramin zalenna a hmuh atanga kum 80 hnaihah Mizoram chu national rail network nen thlunzawm a ni a. Hei hian thil siam chhuahna, sumdawnna leh thil hralh chhuah tipungin hnam inpumkhatna kawngah hmasawnna chak zawk a siam dawn tih larsap hian a sawi. Thalai tan zirna leh eizawnna dap kawngah India ram hmun dang pan a tih awlsam dawn bakah Mizo hnam ziarang leh thil thar chhuah ram pumin an hriatchian lehzual theihnan a pui dawn tih a sawi a ni.
Mizoram chu organic thlai thar kawnga hmahruaitu ni theia thuam leh theihna danglam bik nei a ni, tiin, loneitu, kutthemthiam leh enterpreneur-te organic farming chawilar tur leh ram pum bakah khawvel huapa organic thil siam chhuah kawnga hmahruaitu leh hming chher thama tan la turin a chah.
“India ram zalenna sualtute tawrhna leh an duhthusam India ram siam turin, ram intodelh leh mahni kutkea ding thei ni tura hmalakna, Vikshit Bharat 2047 puitlin theihnan theihtawp chhuah zel ang u,” a ti bawk.