Zangnadawmna phutin office dang zel

Kaladan Multi Modal Transit Transport Project-in a tihchhiat ram neitu intelkhawmten kar kalta Thawhlehni atang khan zangnadawmna an hmuh theih loh avangin tiamchin awm loin thuneitute an nawr a. Mizoram sawrkar hnuaia deputy conservator of forest, Chhimtuipui Wildlife Division office Lawngtlai ami an dan chu an chhunzawm zel.
Lawngtlai District Land Owners Association president T Zatlunga chuan KMMTTP kawngpui km.88-a thuiah Mizoram Environment Forest & Climate Change department chuan km.80 vel chu an ram angin an chhal tih a sawi a. Hei hi a diklo tih Gauhati High Court pawhin a tichiang tawh a, Anti Corruption Bureau pawhin an lo chhuichian tawh thu sawiin, ram neitu diktak mi 138-te ram, Mizoram sawrkar EF&CC department-in a chuhpui tlat chu hriatthiam theih a ni lo tih a sawi.
Sawrkar laipui Ministry of Road Transport & Highways-ah EF&CC department-in an ram anga an lo hauh ngawt chu a diklo tih High Court-a tihchian tawh chu hauh lui zel loin, thil awmdan chiang taka hrilhin clearance a pek thuai an phut tih a sawi a ni.
Ram neitu intelkhawmte hian Lawngtlai district chhimlam leh khawtlang lamten inkalpawhna’n ber an hman KMMTTP kawngpui pawh company-ten an enkawl an remti loa, leivung tla-in kawng a hnawh pawh thenfai hleihtheih lohin a awm tih an sawi.
Ram neitute chuan sawrkar atangin innghah ngamna thu lawmawm engmah an la dawnglo tih an sawi a. Tunkarah pawh office dan hi la chhunzawm an tum tih an sawi a ni.