Zanin Wimbledon final: Swiatek vs Anisimova
Zanin Wimbledon final: Swiatek vs Anisimova
Tunhma lama Wimbledon women’s singles title la hlawhchhuak ngai lo pahnihin zanin hian All England Club-ah final an khel dawn a, tu zawk zawk pawh chak se champion thar an ni dawn.
Poland nula chhuanvawr Iga Swiatek chuan tunhma lama thlensan tak tak a harsatna grass leilungah kumin zet chu par a chhuang a ni ber a, semi-final match pakhat zawkah Ningani zan khan 6-2, 6-0-a Switzerland player Belinda Bencic sawp chungin a tum khatna’n Wimbledon final a lut.
Rafale Nadal ang bawka claycourt specialist ni ve Swiatek hian kumin tih loh hun hmasa lamah khan Wimbledon-ah hian quarter-final a la pel zo ngai lo a, tuntum zet erawh champion zia rang a pu chho zel a, Centre Court ni sensa tang at hnuaiah awlsam taka Bencic paltlangin zanin hian American Amanda Anisimova nen title an inchuh dawn ta a ni.
Pole hian final a lut ta mai hi a awih loh rum rum thu leh heti chen chen he grass-court grand slam-a a thlen phak hi a rin loh thu leh beisei pawh a beisei phak chiah loh thu inkhelh banah sawiin, a dai ngai loh ram a dai ta chu amah pawh a inchhuan thu leh a phur takzet thu tarlang chungin, grass chunga khelh that tak tak a la neih bar loh avangin a tawnhriat thar chuan thathona leh phurna sang tak a pek thu a sawi.
35th-ranked daih ni chunga semi-final hial thleng pha Swiss Bencic tan five-times Grand Slam champion Swiatek meuh hneh chu a khirh lutuk deuh a ni!
Tarlan tak angin, kumin pawh hian kum danga la champion ngai lo ve vein hmeichhe singles final an khel dawn a, tu zawk zawk pawh chak se Wimbledon champion thar an ni dawn a, a zawna kum riat chhung Wimbledon women’s singles champion thar kan hmuhna tur a ni.
Kum 24-a upa Swiatek chuan final-a a khingpui t ur chungchang sawichhuak nghalin, “WTA Tour-ah tak hian Amanda nena kan inhmachhawn ka la hre chiah lo a, junior level-ah chuan kan intum tawh ngei mai a, a khel pui thei em em lehnghal a, ball tleng theihna khelmual hmang thiam chi leh chuti anga khelh ngaina mi a ni.
“Kei pawhin ball kal chak laka lo inralralrin chu ka tum ve tur a ni ngei mai a, mahse, ka khelh dan thin pangngaiah ka insawrbing tlat dawn a, ka game khelh leh tur atan tactic ka buatsaih ve nghal ang,” tiin final a thlirlawk.
Ningani last four inkhel dangah rin kai zawk world number one Aryna Sabalenka chu oven chhung ang maia lum nia an sawi Centre Court-ah 13th seed Anisimova racket atanga ball chhuak dawl zo loin a tlawm ruah mai a, 30 degrees Celsius hnuaiah khan a che hlei thei lote pawh a ni mahna!
Wimbledon final a thlen vawikhatna hringchhuaktu inkhelah American nula Amanda kha 6-4, 4-6, 6-4-in champion tura rinkai Sabalenka a vaw tla a, zanin final-ah hian a chak leh a nih chuan kumina Grand Slam women’s title khelh tawh pathumte chu American nulate kutah vek a lut dawn tihna a ni ang.
Kumin hian grand slam tournament vawi hnih khelh tawhah US player Madison Keys chuan Australian Open title hawnin, French Open-ah a chipui Coco Gauff a champion bawk a, England-a Anisimova a champion leh chuan American mipui an intithei ngawt ang!
Kum 23-a upa Anisimova tan Ningani kha 2019 French Open hnu lama major semi-final a khelh leh vawikhatna chauh niin, chak zawk tura beisei ni pha lo mah se Belarus thiampuinu a hneh tlat a; kumin Australian leh French Open final-a chak zo lo ve ve Aryna Sabalenka tan tuntum chu final khelna kawng a ping ta tlat!
Chak se Belarusian kha kum 2014-15 laia ropui Serena Williams hnu lama major final vawi li khel tling leh hmasaber a ni thei dawn a, rin loh takin a tlawm zawkah a tang ta khut a ni.
Rilru lama harsatna a tawh avangin kum 2023 khan Anisimova hi tennis atangin a han chawl vang vang a, khawng zawngin a kirleh mek a ni.