Zaninah 32nd Lelte Award sem dawn

Lelte Award vawi 32-na chu zanin leh nakzan hian Dawrpui Multipurpose Hall-ah sem a ni dawn ta a, a zan hmasa zawk ‘Gospel Night’ niin, gospel music lama award dawngte hnenah award pek chhuah a ni ang a, award semnaah pawh gospel singer rual an inlan dawn a, a zan hnihna hi ‘Lengzem Night’ niin, lengzem lama award dawng te hnenah sem a ni ve thung ang.
Zanin award semna hi zan dar 7:00-ah Tan a ni dawn a, award hi gospel leh lengzem category belhkhawmin 43 sem tur a awm a, heng bakah hian award dawng tur puan tawh awm bawk a, C Lalzuia leh C Vansanga te hnenah lifetime achievement award hlan a ni ang, H Vanlalhlana hnenah artist of the decade hlan a ni dawn a, Escape Engmawi-a’n young achiever award dawngin, Lalhruaitluanga Chawngte hnenah writer of the year hlan a nih bakah Lalthara leh WB Manner te hnenah special award hlan a ni bawk ang.
Heng bakah hian chibil award- Hmar, Thado, Paihte, Darlawng, Mara leh Lai aTangin award dawng tur an awm dawn bawk a ni.
Zanin award show hi Janis Hnamte-in a host dawn a, Seraphic Choir, Zoramchhani Band, Lallawmawma, Jonathan Lianhna, Maruati, Sawmtea Chhangte, Zorema Khiangte, Faktu leh Kanan Kohhran Pavalai Zaipawl te an perform dawn a ni.
Lelte Award semna hi Lelte YouTube channel bakah Zonet leh LPS-ah te live a en theih a ni ang