Zaninah Mizo film thar ‘Hmakhawsang’ tlangzarh dawn

Mizo thawnthu hrang hrang behchhana thawnthu thar phuahin, Mizo film thar ‘Hmakhawsang’ an siam a, chu film chu zanin hian Vanapa Hall-ah premiere a ni dawn ta a, Lersia Play-ah en theihin dah a ni bawk ang. He film hi CF Lalhruaitluanga direct niin, Reuben Lallawmzuala, Vanlallawmawmi, C Lalrohlua leh Sangtei Renza te channa niin, a film hi chhungkaw kima en ngam chi niin a siamtute chuan an sawi.
A thawnthuah chuan- naupang an bo fo mai a, eng huai emawin a rubo thin niin an ngai a, chung naupangte bo dan hriat chhuah tuma an thawh chhuahnaah an rin leh beisei phak bak thil hlauhawm tak tak an tawn dan vel tarlanna a ni.
He film-ah hian Mizo thawnthua huai leh raumi hrang hrang te pawh puitling zawk te chuan ‘chumi-khami’ chu a nih hi tia hriat theih turin film-ah hian an tarlang a, director chuan, “Mizo thawnthu kan hlut lehzual theih nana siam kan ni pakhat,” a ti nghe nghe.