Zawi zawiin Iran atanga Indian hruai haw hna tawpsan dawn
Zawi zawiin Iran atanga Indian hruai haw hna tawpsan dawn
Tehran-a Indian embassy chuan inkahhai puan a nih avanga Iran-a indona thawm a reh hnuah Indian awmte hruai haw hna chu zawi zawiin an tawpsan dawn tih a sawi.
India hian Thawhlehni khan Iran leh Israel atangin a mi 1,100 chuang hruai haw lehin ram pahnih atanga Operation Sindhu hmanga Indian hruai haw tawh zat chu 3,170 an ni.
Indian embassy chuan contact desk siama hruai haw tur inziah luhna an hawn chu an khar tawh tih an sawi a. Sorkarin boruak inlumlet chu a thlithlai reng tho va, a tul dang ang zelin Iran-a a mite himna derthawng thei a awm chuan ruahmanna siamin a mite himna a ngai pawimawh hle tih a sawi.
Embassy hian Iran hmun danga Indian awm, hruai haw ve nih tuma Mashhad pan tumte chu tuna an awmna ngaia awm rih zawk tura tiin chanchin thar ngaihven thaa embassy-in kaihhruaina a tihchhuah thar ngaichang turin a ti.
“Tun hnaia Mashhad pana Indian kalte chu embassy ruuahmannain khualbukah an awm a, vawiin (Thawhlehni) hian embassy-in khualbuk pindan dang a tihchhuah avangin Sadr khualbukah insawn tura tih an ni,” tiin Tehran-a embassy chuan X-ah a tar lang.
“Embassy hian Sadr khualbuka pindante chu zan hnih (June 26-a chhuah hun tur thleng) a la hauh vek a. Hei hi khua leh tuiten Iran-a himna dinhmun an ngaihchana dan pangngaia awm leh theih a beiseiawm thleng a ni,” tiin an tar lang bawk.
Thurawn emaw, puih ngai emaw Indian zingah an awm a nih chuan embassy chu a hmaa telegram channel emaw, helpline an siamah emaw biakpawh theih a nih thu an sawi bawk a. “Heng inbiakpawhna hi hawn leh thuai a ni dawn,” an ti.
Iran leh Israel hian ni 12 chhung an inkah hnuah inkahhai an puang a, Thawhlehni khan US President Donald Trump-a’n a Truth Social-ah a puang.
Inkahhai inremna an neih hnu lawkah hian Israel chuan Iran-in a bawhchhe nghal niin a sawi a. A hnuah Trump-a hian ram pahnihte hi vauin Israel chu inkahhai a bawhchhiat avangin na takin a hau va, hawrawppui vekin bomb thlak tawh lo turin Truth Social-ah hian a tihna a tar lang.