Zawlnuamah sangha tin siamna din

Zawlnuamah sangha tin siamna din
Zawlnuam Fishery Cooperation Society Ltd. in sangha tin siamna khawl chu Zirtawpni khan Cooperation minister PC Vanlalruata’n a hawng.
Sangha tin siamna khawl hi 2024 July khan Cooperative department chuan sawrkar laipui hnenah thlensakin, Integrated Cooperative Development Project kaltlangin cheng nuai 65 hmuh a ni a, khawl leinan nuai 40 hman niin, a in sakna atan nuai 25 hman a ni. Sangha tin hi vawikhatah kg..50 siam theih niin, chu chu a tin chuan tin 120 a ni a, hemi siam chhuak tur hian darkar hnih a awh a ni.
Sangha tin siam chu sangha tharchhuah hralh lehna kawngah kuthnathawktute a pui dawn tih Cooperation minister hian a sawi a. “Sangha kan manin a lian chiah hralh a nuamin, a man pawh a pangngaiin a hralh theih thin a, tunah chuan a te deuh zawk pawh sangha tinah siam theih a ni dawn ta hi a tha hle a, chutihrualin ei leh in siamtu kan nih avangin fimkhur tak leh mipuiin an duh tur ngeia siamchhuak tura inbuatsaih a tul,” a ti.
Industry hlawhtlinna ber chu min dawrtu mipui mit kan tlung em, an duhzawng kan siamchhuak em, tih ngaihtuah nachang hria apiangin hmasawnna hmel an hmu thin tih a sawi a ni.
Sangha tin siamna khawl hawnnaah hian Hachhek bialtu MLA Robert Romawia Royte pawhin a telpui a ni.