Zia deuh tawh mah se a la nu

Tun hnaiah Tlawng lui a nu vak a, chawlhkar tharah chuan a zia ta deuh. Mahse, a zia deuh e an ti na a, la nu ngeih ngeih tak chu a ni.
Kar hmasa Zirtawpnia ruah surah khan Tlawng lui hi namen lovin a nu a, Inrinni zing lam atangin PHE department-in pump chi-ah ngai lovin an nghak tawp. Chawlhni lamah khan a zia ta deuh a, mahse a la nu hle.
Tui fim dan tehna NTU (Nephelometric Turbidity unit) a awm a, PHE department chuan tui hi NTU 5 leh a hnuai lam a nihin mipui hnena sem tlakah an ngai. NTU 5 chung a nih pawhin NTU 5-ah tal tlaktir tumin an tifim thin. Tun hnai kum hnih kum thum velah Tlawng lui tui hi NTU 5 nihtir tum rual loh khawpin a nu fo.
PHE department hotute chuan a pangngaiah chuan Tlawng lui hi NTU 100 hnuai a ni thin a, a nu lo an ti a, mahse tun hnaiah NTU 1000 dawn dawn a ni!
Inrinni zing lamah khan NTU 984 te a ni a, hetiang em em hi chu tihfim theihah an ngai lo. An nghak tawp a, Chawlhni lamah a zia ta – NTU 600 vel a ni.
NTU 600 pawh hi nu tak a ni a, mahse mipuiin tui an mamawh avangin tihfim phawt atan PHE department hian Chawlhni khan tui hi an pump.
Aizawl tui tlan Tlawng lui hi nikum khan NTU 1000 chuang a ni fo a, kuminah pawh April ni 17-20 chhung khan NTU 1000 chuang a kai.
PHE department hotute chuan tun hnaia tui nu hi a nghet a, a fim har an ti a, a chhan tak hriat a har thu sawiin, leivung leh bawlhhlawh vang a ni ber tih erawh hai rual a nih loh thu an sawi.
A luiah te,a kam velah te leivung leh bawlhhlawh chi hrang hrang a tam a, ruah a surin chung chuan a tinu ta thin tih an sawi.
Leimin leh ko pang bal te chu thuhran ni se, lui leh a kama leivung paih an awm thin thu an sawi a, lui kam vela ram neitute’n luiah paih burh burh lo pawh ni se a bul hnaia lei leh bawlhhlawh an chhekkhawl kha ruah a surin luiah a lut thin tho tih an sawi bawk.