ZIDCO-in bana kaih hman tangkai kan tum – Chairman

ZIDCO chuan Year of Reconstruction puangin sawrkar suma leiba rulhsakna do let thei turin an inbuatsaih a. ZPM policy – Hand Holding chu tangkai taka kalpui an tum tih ZIDCO chairman JK Dawngzuala chuan a sawi.
Thawhtannia ZPM office-a inkhawmah ZIDCO chairman chuan an hnathawh ber chu ‘industrial financing’ a ni a. Kum 1997-2003 chhung khan loan rulh that loh cheng vaibelchhe 15 a awm a, tunah vbch. 8.10 rulh tur la awmin, interest & penalties chu vbch. 12.23 a awm a, belhkhawmin vbch. 20.33 a ni tih a sawi.
“NMDFC (National Minorities Development & Finance Corporation) hian tum khata kan rulh vek theih chuan cheng vbch. 12.23 min ngaidam thei a, state sawrkarin hei hi a ngaihtuah mek. Kum 2006-ah HUDCO housing loan vbch.10 leh motor rarking loan atan vbch. 2.27, a vaiin vbch. 12.27 nen, vbch. 15 pek a ni tawh a, heti zat pek a ni tawh chung hian interest/penalties avangin namen loa tam HUDCO-ah bat a la ni,” a ti.
Debt Recovery Tribunal Guwahati-ah HUDCO hi khin niin, settlement package dil a ni a; vbch. 20.44 a rulh zawh phalsak kan ni a. State sawrkarin rulhsak dan tur hi interest free loan (kum 10 chhunga rulh let tur) ah vbch. 10.22 leh Grant to ZIDCO-ah vbch. 10.22 niin, heta tang hian vbch. 5.11 pek an ni tawh a, kumin May/ June chhung hian a dang vbch. 15.33 pek tum a ni tih a sawi a ni.
Tunah hian hna kal lai pahnih JNV Siaha-ah vbch. 33.54 (March 2024-a zawh hman tum) leh IGC upgradation (SASCI) ah vbch. 13.42 a awm mek a, sum hloh tlingkhawm (accumulated loss) vbch. 8.45 a awm tih JK Dawngliana hian a sawi bawk a. ZIDCO-ah hian post 81 awmin, tunah thawktu 29 an awm a, sawrkar grant hmangin thawktu hlawh leh mamawh pek a ni tih a sawi.