Zingkarah larsap-in sa talhna tlawh

AH & Vety department enkawl Aizawla sa talhna hmun ‘Modern Slauhter House Mualpui’ chu Nilaini zing dar 4.30 khan Mizoram larsap Indra Sena Reddy Nallu chuan tlawhin a enfiah.
Larsap chuan kan ei leh in a hrisel tha em tih finfiah hmasak fo a tul tih sawiin, hemi atanga natna kai theih laka fihlim tura tan lak a tul tih a sawi. Ran talh tur reng rengte a hrisel em, tih talh hma leh a hnua enfiah zel a pawimawh thu sawiin, ran talhna hmun ni loa talh a awm loh nan hma lak a tul tih a sawi a ni. Modern Slauhter House Mualpui chu a nihna ang taka mumal zawka kalpui a nih theih nana tan la turin thawktute a chah bawk.
Larsap hi AH & Vety department hotuten lo dawng sawngin, Modern Slauhter House kalphung leh hmalak dan an lo hrilhfiah a. Kum 2013-ah he hmun hi hawn niin, Pathianni tih loh kar tluanin helai hmunah hian sa talh thin a ni. A hrisel tha em tih vety doctor-in a enfiah thin a. Report-a tarlan danin, thla khatah chawhrualin ran 500-600 vel an talh tlangpui.