Zonunkima
5th Semester
Department of Political Science
Government Aizawl West College
-- Advertisement --
Khawtlâng (society) chu mihring awm khâwm ina a siam a ni a. Chu Khawtlangah chuan remna leh muanna, a mi chengate tan bawka chhenfakawm tur a lo awm theih nan Kohhran leh tlawmngai pawl hrang hrang a ding a. Khawtlâng bawk hian lâwm niah min lawmpui a, chhiat niah min tuarpui a, lungngaih hunah min hnem thin; engkim a chhia a thaa kan tana inhawng reng a ni a. Chuvangin Khawtlâng kan hmangaiha, a thatna tur kan duh a nih chuan tha kan thawh ve tur a ni a. Kan mawhphurhnaah ngaiin heng social activities kan tih, Kohhran leh tlawmngai pawl hrang hrangah kan hman a nih chuan kan phak ang tawkin kan Inhmang ve tur a ni, tiin bul i han tan phawt mai teh ang.
Mi then khatin “Kohhran leh Khawtlâng (Social activities)-a inhman hi hun khawh ralna mai a ni” -te kan ti ta thin a, ‘huau huauna’ hmun chi khat ang thaw thângah chauh kan ngai thin. Social activities-a kan va tel hian kan va thu mai mai lo va, fiamthu thawhin ka va nui bâwk bâwk satliah ringawt lo. Thil tam tak college/zirna sikula kan zir loh kan zir belh a; chuti a nih chuan Kohhran leh khawtlâng chêt chânna chu Social activities ringawt ni lovin, ‘khawtlang nun phung inzirtirna’ (social institution) a lo ni reng bawk tihna a ni. “Naupang chu a kalna âwm kawngah chuan zirtîr ula, A upat hun pawhin a thlah lo vang” tih Bible-ah kan hmu. Naupan laia atanga Kohhran leh Khawtlâng pawimawh zia leh kan hman changa tel ve tur kan nihzia kan zirtir loh chuan, engtin nge an puitlin hnuah an rawn ngaih pawimawh leh hnuhnawh thut teh reng ang ni. A theih loh ve chu ka ti lova, mah se, than hnana, rilrua tuh zawng a nghet daih zawk awm asin.
Kohhran leh khawtlânga inhman hian thatna tam tak a nei a, a thatna tlem han tar lang ta ila:
1) Mi dangte nena thawhho thiamna, mi dangte zai ngaih thiamna min neihtir a, thil ning khâwng kan hriat phah bawk.
2) Rual pawlna chi khat a ni a; tin, kan thil thiam loh kan zirna hmun leh kan thiam sa reng pawh kan zir belhna leh kan hman chhuah theihna hmun a ni. Entirnan: YMA, YMA chhang, MHIP, Cultural Club, Zirlai pawl etc angahte Hnam lam leh hnam thil chhawm nun zel dan kan zir a. K|P, |KP, SAY, PYD etc angah hlate zirin solfa kan thiam nial nual phaha, music ni se a zir mi tan phei Chuan ‘jam room’ thlengin a zirna tur kan nei deuh fur tawha, a tangkai tak zet a ni.
3. Aia upa, zah tur an nihzia kan hriat chian phah a, tlawmngaihna kan lan chhuahtirna hmun a ni bawk.
4. Kan kova tla chanvo/ mawhphurhna hlen thei turin min buatsaiha, puitling zawka min siamtu a ni.
Hetiang ang hi ni mah se, a hruaitute leh enkawltute chu mihring ve tho an nih avângin a famkim bik lova, sulhnu pawr leh kal phung fuh lo a lo neih châng pawh a awm a ni mai thei e. Mi then khat, zel thel leh an nihna hma chhuana inla vei vung te, pawl din chhan nen a inrem lo, a letling thawka lo khawsa te, tlawmngaih chhuah an nih avânga dan chunga leng emaw intite leh chhan hrang hrang vângtein pawl hming a bâl thin. Mi thenkhat te’n hmuhmawh nâna hmangin, tel vena tlakah ngai lovin an sêl ta chiam thin. Pu F. Lalrammawia’n, “Kan Mizia” tih article-ah, “Khawtlang leh kohhran siam that duh kan inti a, a siam thatna tak tak tura inpe thei der si lo, mi tih a tana sawi zut zut thiam kan ni,” a tih hi dik hlein ka hria. Chuti ang hnam chu ni mah ila, keini chuan pâwn lam atanga ral khat chirh theh mai lovin, chhûng lam atangin siam that kan tum zawk tur a ni.
Thil rêng rêng hian thlirna tlâng dang a nei ngei ngei thin. “Zirlai tan Kohhran leh khawtlâng a inhman hi a tul lo” te kan ti thin. Ni e, a Dikna chen a awm a, ngaih dan pawh a inang lo thei ang. KC Zelena, 2022 MCS topper ka zawhnaah chuan ani chuan, “Hei chu chhan thiam a har khawp mai. Zirlai chuan kan duty hmasa ber lehkha zir hi ngai pawimawh hmasa ber ila, chumi hnua hun awl kan neih chuan khawtlang leh kohhrana inhman chu a pawina ka hre lo. Amaherawhchu, zirlai nih chuan zirna hi kan ngai pawimawh hmasa ber turah ka ngai” tiin min chhang a ni. Ni e, Zirlai nih inhre lo lêka Kohhran leh khawtlânga va inhman hi fuh ber lova, zirlai kan nih chuan zirna kan ngai pawimawh tur a ni. Chutih rualin zir nasat a ngaih vak loh hun, exam zawh leh kan hman remchan hun angah chuan kan tel ve tur a ni a, inhman dan tâwk kan thiam erawh a ngai a ni. Lehkha zir paha ngaihzawng kan nei thiam a nih chuan, zir paha social activities-a tel thiam ve âwm tak hi! Engah nge inkawkalh tlat anga kan ngaih thin ni?
Kum 2019 khan Pachhunga University College zirlai Laltlanmawii chuan B.Sc. Mathematics subject-ah CGPA 9.46 hmuin Gold medalist niin, an batch-ah a ni aia CGPA hmu hnem subject dangah pawh an awm lo hial a ni. Tlanmawii chuan, “Kohhran leh khawtlâng thil tihnaa ka tel chuan, bân hnuah lehkha ka zir a ngai a ni mai a. Ka lehkha zir tan hun a tlai a, ka zir zawh hun pawh a tlai a ngai a ni mai a; ka zir hun chhung chu a ngai reng tho…. kohhran leh Khawtlânga ka inhmanna hian ka zirna a tibuai lo” a ti a. Kan lecturer hlui Pakhat pawh K|P-ah committee member, active member ni chungin PHD Degree-a nei thei a ni. Mi chuan an tum a, an ti tak tak a, an thei mai a ni.
Eng anga lehkha thiam pawh, Kohhran leh khawtlânga inhman leh ngaih pawimawh nachâng a hriat loh chuan amahah tlakchham/kim lohna a nei nghal phawt tihna a ni a, education-in a tum ‘Kawng engkim a hmasawnna’ a ti hlawhtling thei lo nghal phawt a, puitlin tâwk lohna a nei tihna a ni bawk ang. Central service-a kan tlin theih loh chhanah leh hma sawnna than ti thutu ang hialahte kan la puh ta deuh deuh va. Mawhpuh tur a awm a nih chuan social activities-a va inhman hmuh viau ai chuan, zan khaw tai rêk thleng thlenga smart phone kan khawih thin hian zirna a ti bahlah zawk ngeiin a rinawm a, mawhpuh hmasak zawk tur awm tak a ni. Tin, IAS-a inziak tling hnuhnung ber kan neihna pawh 2014 daih tawh kha a ni ta. Kan tlin theih loh chhanah Social activities hi kan bur bun fo mai, kan tlin theih loh chhan pakhat nia lang chu Sorkar hian MCS-te hi a dah nuam sa ve bawk a ni. Vai rama awm ai chuan mahni ram ngeiah hlawh tha tâwk tak neiha officer han nih kha a lo thlanawm zawk rêng a, a âwm rêng bawk a, dem theih an ni lo. Kan education system piah lamah kan rilru suk thlek (mind set) dik tawk loh vang a ni tih loh rual a ni lo.
Heti hian tlângkawmna i han nei dawn teh ang. Kohhran leh khawtlânga inhman tur kan tih avânga a kûl a tâia va inhman a, active member va nih kher tur kan tihna a ni lova, min phût kher lo bawk ang, chutianga inhmang thei kan awm a nih leh a tha hlei hlei a ni mai a. Kum 1891-a chanchin tha a rawn luh hnuah kan lo changkang ta deuh deuh va, Kohhran dinin Zosap Missionary-te zarah Kohhran kal tlanga damdawi in leh zirnate din belh zel a ni bawk a, hnathawh dan kan lo thiam phah a, kan taksa leh thlai te thlengin kan thatpuiin kan hmuingil phah a, YMA leh tlawmngai pawl dang pawh a din belh ta zel a, a hma zawng aiin hmasawnna a chak phah tih kan hria. Hengte hi Chanchin tha rawn luh zar kan zo, Kohhran leh Khawtlâng thawhhona leh an lo thawh tâwhte avanga tun din hmun kan thlen theihna chhan pakhat a ni.
US president hlui, John F Kennedy khan, “Ka ram hian eng nge mi tih sak theih ang tih inzawt loin, ka ram tan hian eng nge ka tih ve theih ang tih inzawt zawk rawh” a lo tih ang deuhvin, hamthatna dawng tur leh a hming ringawta Kohhran leh Khawtlânga awm mai lovin, khua leh tui kan nihna zawnah kan bat ve rengah ngaiin; i hman a nih phawt chuan thlânte lo lai ve la, khawhar inahte lo kal ve la, lo hnatlang la, lo inkhawm ve thin ang che. Kohhran leh Khawtlâng tha ti chaktu kan lo nih ve theih nan Social activities-a inhman hi i ngai pawimawh deuh deuh ang u.