Zirlaite bana kaih…

Chief minister Lalduhoma chuan tun hnai khan zirtirtute hmaah thu a sawi a. “Sawrkar laipuiah hna a tam a, tribal quota pawh kan hnawh khat zo thei lo; kan naupangte lehkha thiam leh hriam zawka kan chher chhuah phawt chuan ‘hna a vang’ an ti ve dawn lo..” tiin a sawi a.
He thu hi chief minister hian, a bial Serchhip-a zirtirtu pawl (Serchhip Teachers Association) huaihawt MLA trophy inter school challenge 2025 kharna a hmanpuinaah a sawi a ni.
Chief minister thusawi atang hian zirna lama Mizoram dinhmun point pahnih a lo lang a; tawi tein han chip (analyse) ila.
Pakhatnaah chuan, zirlaiten lehkha an thiam tawk lo. Pahnihnaah chuan, zirlaite an hriam tawk lo.
Zirlaite hi A AW B / A B C atanga bul tanin academic degree te neiin a tawpah university te an rawn zo (graduate) a, lehkhathiam tia sawi tur chu an ni ta phawt; thiam lo se, university an chhuak dawn lo.
Kan state chhungah hian lehkhathiamte thawh tur ang chi hna hi a tam lo tih chu hriatchian sa a ni; chuti chungin kum tin graduate rual a sang tel an lo chhuak hum hum reng a. Chief minister-in a sawi anga Central lamah hna a tam a, tribal quota hnawh khah tur a tam a nih si chuan, kan thalai lehkhathiamte hian an hriat loh vang nge, hre reng chungin hna hi an bawh ngam lo zawk? An bawh ngam lo a nih chuan, an thiamna an sit ta mai tihna em ni? Chutah chuan tu nge mawh phur sang zawk ta ang, zirtirtute nge zirlaite?
An hriam tawk lo. Point hmasa zawk nen a inhnaih hle a; lehkhathiam theuh theuh pawh hi an inhriam hleih thei hle. Hei tak hi zirtirtute pawimawhna tak pakhat chu a ni awm e. Zirtirtu Ni (Teacher’s Day) a lo thlen apianga thusawi (quotation) lar tak pakhat chu, “Zirtirtute hi hmantlak leh chhawrtlaka zirlaite chher hriamtu/chher chhuaktu an ni” tih hi a ni. Zirlaite hi mark sang tak hmua ‘thiam’ tia kan sawi bakah hian, an mihring mihrinna (personality) hi chher hriam belh a tul tel a, chuta tang chuan ‘mahni inrintawkna an nei’ a, an hmaa thil awm hmachhawn huphurh lovin an phur zawk thin; chher hriam an nih tawh chuan.
Tun laia youtuber thenkhatin khawlaia mi interview tawi (Quiz) an neihpuinaah, college/university zirlai thenkhat, Mizoram chanchin tlanglawn tak tak zawhna chhang thei lo an awm nual mai a, zawhna an chhan theih loh kha, graduate chin tana hriat awm ngawih ngawih (eg- state flower, sate bird, state animal etc.) te a ni hlawm a, a manganthlak hle.
Central lama hna thawh tur awm reng si, hnathawh tur nei lo graduate rual, Mizoram chhunga inhnawh khawm tup tup, an bana kaih dawr dawr ngaite hi, kuthnathawkte bana kaih ang tho hian sawrkar hian kai ve dawr dawr se a duhawm hle a ni.