Zirlaite harsaten loan an lak theih dan kan ngaihtuah ang – Lalsawta

Zirlaite harsaten loan an lak theih
dan kan ngaihtuah ang – Lalsawta
An sawrkar a nih chuan zirlai harsaten an zir zelna tura mamawh loan an lak theihna’n sawrkarin a ngaihtuah dawn tih Congress president Lalsawta chuan a sawi.
National Students’ Union of India Mizoram chuan 2022- 2023 HSLC leh HSSLC topper-te lawmpuina chu Thawhlehni khan Aizawlah a buatsaih a. He hun hmanpuitu Congress president Lalsawta chuan zirlaite tan bank atanga student loan lak a harsa a, Congress party a sawrkar chuan remruatna tha leh tluantling siam an tum tih a sawi. “2023 MLA inthlan Congress party Manifesto No.1 – Tang Puihna huamchhungah zirlai zir zawm duh harsatna tawkte saltanna atanga in chhuah theihna’n loan mamawhte tan theihtawpa hmalak theih a ni a; hengte tan hian sawrkar a ding dawn,” a ti.
Mizoramah ram danga an neih ang leh an tih dan tam tak nei ve vek mah ila, kan kalpui thin danah leh sawrkar chakna hmanga zirlaite kan enkawl danah kawng thar, reforms tam tak neih a ngai tih Lalsawta hian sawiin, “Mipuiin sawrkar school aia private school an thlang tlatte thleng hian sawrkar tan chuan siamthat tur a tam tih a chiang a. Congress party chuan kan ram mamawh a nih dan kan hria a, reforms ngai tam tak zinga kan ngaihpawimawh a ni,” a ti.
NSUI president RB Lalmalsawma chuan Aizawl khawpui leh Mizoram hmun dangah zirlaiten harsatna tam tak an tawk a. Duh ang taka lehkha pawh zir hleithei loin an inhlawh thin tih a sawi a. Hengte tan hian sawrkarin hamthatna a pek a tul, tiin, “Sawrkar school-in hamthatna hrang hrang an dawn angte hi private school tan pawh huam tel tir a tul. NSUI hian zirlai mangang leh harsatna tawkte tanpui leh dawmkan hna a thawk thin a. Zirlai tam takin hlawhtlinna an chan phah a ni,” a ti. Mizorama zirlaiten harsatna an tawk a nih chuan an puih theih thu leh state dangah phei chuan nasa takin NSUI-in a puih theih avangin zirlaite tan an awm reng tih a sawi bawk.