Zirlaite thunun…
Tun hnaia social media lama thehdarh (viral) pakhat tha deuh mai chu, Saitual YMA information mike atanga thupuan kha a ni. Kha thupuan kha zan lam dar 7 vel ni tura ngaih a ni a, khawlaia zirlai chhuakte emaw, in lama awm mekte emaw pawh, lehkha zir lova thil dang ti mekte lehkha zir tawh tura hriattirna leh ngenna/fuihna thute a ni a; hetiang deuh hi a ni:
“….In lam pan a hun e, nakin lawka kan khawtlang nghahfak ni tur zirlai fel tak tak te, zirnaah in hlawhtlin loh kan va hlau em! Hlawhtling tur chuan thawhrim hmasak a ngai tih kan hriat kha… zirlai naupang zawng zawngte lehkha zir tan a hun ta, kan tv en lai te, kan games khelh lai te, kan phone en lai te, kan thiltih dangte dah thain lehkha i zir ang aw.. pawna leng chhuak kan la awm a nih chuan, YMA ten zan len chhuah an khap hre rengin mahni in lam pan a hun e…. kan zirlaibu theuhte keuvin i zir tan ang u le,” tiin.
Tun lai kan khawsak phung han en vang vang hian, nu leh pa tam tak chuan an fate hi in lamah an thunun/khuahkhirh hlei thei tawh lo niin a lang. Information technology lama hmasawnna hi kawng lehlamah chuan thatpui viau mah ila, a lehlamah nghawng tha lo tak a nei ve bawk a, chu chu kan hriat tlan vek mek hi a ni. Nu leh pa tam tak chuan an fate zirna sikula an luhtir hma daih atang tawhin nau awm tlei nan mobile phone handset an khalhtir a, eng eng emaw an khawih thiamte hi kan lawm em em a. Mahse, sikul an han lut a, homework an ti thei hram a, homework an tih zawh rualin handset an ban leh nghal a, nu leh pa thu an pawisa hleithei tawh lo thin.
In lamah nu leh pain an kilkawi hleih theih loh, sikul lamah pawh zirtirtute ngai pawimawh vak tawh lo zirlai an tam a, khawlai nun tha lo an seng lut thuai a, a tawpah drop out, a dawtah ruihhlo, a dawtah khawtlang leh sawrkar pawisawina, a tawpah chhungkaw mualphona leh jail…a ni tawh mai thin.
Thir chu a lin laiin deng/chhu rawh tih a ni a. Tun lai kan khawsak phung atang hi chuan, hetianga khawtlang/pawl nena tanhona hi a tul tawh hle a, chutih rualin, hei hian zirna lamah hmasawnna tha zawkte pawh a pawchhuak ngeiin a rinawm a, hei hi Mizoram khaw tinah hian tihdan phungah nei chho ta ila, tun ai hian zirna lamah hma kan sawn chak zawk ngeiin a rinawm.