Zirna atana digital hmasawnna sawi

Zirna atana digital hmasawnna sawi
Mizoram University leh Amrita University (Amrita Vishwa Vidyapeetham) Kerala tangdun chuan zirna leh zirna atana digital hmasawnna chungchang NGO leh khawtlang hruaitute nena sawihona – Civil 20 (C20) Mizoram Conclave on Education & Digital Transformation, G-20 hnuaia hmalakna chu Thawhlehni khan MZU-ah an buatsaih.
Conclave hmanpuitu larsap Dr Hari Babu Kambhampati chuan Amrita University leh Mizoram University tangdunin Science and Technology Innovation Hub (STI Hub) an din hmanga tribal mite zirna, eizawnna leh khawsak phung tih hmasawnna’na hma lak an tumna program a hawng nghal a. MZU leh Amrita University thawhdunna hnuaiah G20 hmalakna zinga pawimawh ber pakhat, tlawmngai pawl leh khawtlang hruaitute nena zirna kawnga hmasawnna chungchang sawi ho a ni chu lawmawm a tih thu sawiin, mithiamte leh conclave chhim tura sawmbik tlawmngai pawl leh khawtlang hruaitute chuan thupui pathum an sawihona atangin hmalak dan tur tha zawk an hmuhchhuah a beisei tih a sawi a ni.
India ram chu digital technology-ah hma a sawn nasa tawh hle a, tunah hian 5G technology kan hmang tawh a, kum 2030 ah chuan 6G hman tum a ni, tia sawiin, “Hetianga India-in nasa taka digital technology-a hma a sawn tak hnuaah hian kan ram tawhchhuah leh theihna chu Gross Domestic Product (GDP) hmanga teh theih a ni ta lo a; Gross Domestic Knowlegde Potential (GDKP) a ni tawh zawk a. Knowledge – “K” factor-ah phei chuan khawvelah hmahruaitu kan ni mek a. Knowledge leh education anga kan theihna hi technology hmangin kan peipung mek a ni,” a ti.
Conclave-ah hian Impulse NGO Network & Impulse Social Enterprises Shillong founder & chairperson Hasina Kharbhih bakah Central YMA vice president Lalhmachhuana leh Working Group on C20 national coordinator Prof Prema Nedungadi ten thu an sawi a ni.
MZU thawhpui Amrita University chu India rama University thazual NIRF Ranking 2022-ah university thaber 5-na a ni mek a. MZU leh Amrita University thawhhona hnuaiah hian Science, Technology leh Innovation hub hi Aizawl leh Serchhipah siam a ni dawn a ni.