Mizorama sawrkar school hrang hrang an fannaah zirna in a chhiat bakah zirna quality a chhia a, a tha nia sawite hian a hmunah an tlawhchhuak vek lo tih a chiang tih AAP Mizoram chuan an sawi.
AAP Mizoram thuchhuak chuan an party-in zirna an ngaipawimawh a, ramhnuk khawih thil a nih avang leh ram hmasawnna atan a pawimawh berte zing ami a nih avangin Mizorama cheng tute pawhin ngaihven a ngai tih a sawi. Hmun hrang hrangah sawrkar school an tlawhkual mek a, tunkar khan Aizawl South III leh Serchhip district school thenkhat an tlawh leh tih a sawi a ni.
AAP Mizoram vice president C Lalkhuma chuan tuna sawrkar school chu neitu neilo ang maiin an kal a, zirna in a chhiat em em rualin zirna quality pawh a chhe hle tih a sawi. “Sawrkarna chelhtuten zirna a tha an tih chhan hi a hmuna kal ngeiten kan hrethiam loa, eng angin nge zirna tha an teh, tih hi kan hre duh a, a changtu minister emaw a bialtu MLA-te hian kumtin sawrkar zirna in hi vawi hnih- khat tal pawh tlawh se, hma kan sawn phah ngei ang,” a ti.
Sawrkar school-a lut naupang tam zawkin future an neiloa, nakin lawka kan ram chawkbuaitu an la ni thei tih kan hriat a tul hle tih AAP hruaitu hian sawiin, “Mizorama naupang awm zawng zawngte zirna tha pek hi sawrkar mawhphurhna a ni a, hun tlemte an neih chhung ngei hian he an mawhphurhna hi hlen ngei turin sawrkar kan phut a ni,” a ti.
Tuna MLA zingah kum khata an MLA fund atanga zirna lama cheng nuai 15 aia tam hmang mi pakhat chiah a awm thu leh hei hian tuna kan ram hruaituten zirna an ngaihthah zia a tih lan chian thu C Lalkhuma hian a sawi a. Sawrkarna chelh tawhten zirna an ngaihpawimawh loh rah kan tel mek a. Thalai hna neilo leh ruihhlo ngai an tam em em chhan pawh tunhmaa zirna kan ngaihthah vang a ni, tiin, hetiang renga Mizoram a kal hi AAP chuan a phal loa, an sawrkar a nih chuan Delhi Education Policy hmangin Mizorama zirna an siamtha dawn tih a sawi.
Zirna in a chhiat bakah zirna quality a chhia – AAP Mizoram
Get real time updates directly on you device, subscribe now.
Prev Post