Samagra Shiksha Hnahthial buatsaihin Zirtawpni khan Hnahthial-ah quality education chungchang leh zirlaite hmalam hun atana hriat tur tul inzirtir a nih bakah HSLC leh HSSLC pass tharte lawmpuina hman a ni.
He hun hmanpuitu Higher & Technical Education minister Dr R Lalthangliana chuan a pangngai, pass satliah tan hna hmuh a harin awmzia a awm loa, thiamna tak tak neih a ngai tih a sawi a. Zirtirtute pawhin an zirlaite-ah chhawrtlak thiamna an pe thei tih an inhriat thar a duh tih sawiin, chutiang tura an inbuatsaih a beisei tih a sawi a ni.
Zoram Medical College-a department hrang hrangah hna an lak dawnin Mizo nula leh tlangval zingah qualify an vang thin hle a, hnamdang sawm a ngaih chang a awm thin tih a sawi. Super specialist doctor pawh Mizo nula tlangval zingah kut zungtang thliah tham lek an awm thu Health minister Dr R Lalthangliana hian sawiin, thlawhna pilot pawh Mizo zingah 5 an awm tlin loh bakah All India Service lamah lah sawi tur an van tak thu a sawi. “Kan rualpawl dan hi kan inenfiah a ngai. Khawvel inher danglam chak takah Mizoram chhung chauh ngaihtuah loin dak chhuak zel ang u,” zirlaite a fuih.
Hnahthial bawrhsap R.Lalremsanga pawhin tuna Hnahthial zirlaite chu Hnahthial hmalam hun an ni, tiin, Hnahthial chu district thar a nih angin district-in a kentel hmasawnna tam tak kalpui a nih thu leh mipuiin a dawhthleng an dawh thiam a tul thu a sawi.
Resource person sawmten zirlaite hriat tur tul an hrilh a. Hnahthial Centre atanga HSLC leh HSSLC pass tharte hnenah lawmpuina hlan niin, Govt Hnahthial College hnenah tunhnaia award an dawn lawmpuina hlan a ni bawk.
Zirna kawnga zirlaite hria tur hrilh
Get real time updates directly on you device, subscribe now.
Prev Post