Zirna leh infiamna uar veng: Mayor’s Cup champion Khatla South kha…

Zirna leh infiamna uar veng:
Mayor’s Cup champion Khatla South kha…
Mayor’s Cup 2025 an chawi theihna’na thapui leh thahrui bakah an thiamna nena an veng, Khatla South tana rawn hlan a, penchhuakte zinga an player mi sawm vel, Hmachhuana leh Johan-a te thianho hi zirna lamah pawh an chhuanawm viau.
Engtik lai mahin zirna tithuanawp zawngin infiamna nen an pawlh buai ngai lo va, pawl 10 leh 12-ah distinction-ah an passed thap theih phah!
An za hian Dennis Basketball Academy (DBA) lama an veng naupangte kaihruaia chherchhuak thintu Pu Dennis-a kutchhuak vek an ni cheu. MVP ni ta Ropuia khan a rawn belh zui bawk a, ani Ropuia tih loh phei hi chu kum 23 bawr leh a hnuai lam vek an la ni zui.
‘Tirkoh Paul-a’n a phun a, Apolova’n tuiin a chawm…’ tih ang mai khan Dennis-a phun sa hi champion-puitu an coach Opa Varte leh an manager Ray-ate’n an chawm zui a, khawtlang puihna nen an champion – zan khat thil thua vanneihna rawn par chhuak thut a ni lo, a ni tlat lo.
Naupang te an nih lai atanga chher an ni. Zirna tha dawng lo player chu an than a thu a, sikul lama lo chawmtu St. Joseph HSS hotupa Sir Sangtea leh a staff-te pawhin he’ng rawlthar rual hi an sikul chhuak vek ni hek le – an chhuang ngawt ang.
Mayor’s Cup an venga an hawn hma hian an veng club Barons tan 2nd division runner up (2021), 1st. division champion (2022) leh Mizoram Super League (2023)-ahte khan hniak mawm tak an lo hnutchhiah tawh.
Inter Veng (Rum Pum – 2015) khan an champion a; CYMA Inter Branch neih hnuhnun ber, kum 2018 khan an veng hi an champion zui leh bawk.
Hei, tunah Mayor’s Cup an chawi leh ta – kum 2014 atanga 2016 thleng khan an veng thalaite’n rualelna rilru an put theihna turin an veng basketball local league an neihte kha an chhawr tih a hriat asin aw…
He’ng rawlthar rual tan hian an veng GSA te, Dr. H. Lalrinmawia (Dr. Mawitea) leh veng chhunga basketball uar hmasatu leh anmahni ho hruaia hrualtu, lar leh lansarh duh hauh lo – Dennis, Raymond, Mapuia, Roy-a leh Biaka (RIP)-te lakah hian an lawm ngawtin a rinawm.
Mizoram Super League (MSL) thleng Mizo hlanga an chuankai theihna tura sum anni ho hian an sen nasatziate kha turu hem hem tak a ni!
‘Sermon za aiin thuawihna a hlu’ tih thu ang khan, zirna leh infiamna kalkawptir chiattu Khatla South rawlthar tha za rual player-te hi fakna hlawh tur leh entawn hmaih loh tur chu an ni bawk.
Mizote’n infiamna kan ngaina a, mahni veng thalaite huikhawm leh hokhawm peih hi veng leh khaw tinah an awm deuh vek ang – chhan hrang hrang vangin tlin rei erawh a har. Khatla South venga basketball lo tisawt hmasatu Dennis-a te thianho erawh hi chuan kum 1999 atanga kum 2025 thleng an veng thalaite tan Khatla South Barons basketball club an la tinung thei reng a, phur leh puak thaka zirna nena infiamna suihzawm tang tang peih anni ang hi mi dang awm ve ngat se – chu’ng mite nen chuan an pualin ring taka dingin kut kan beng ang, kan beng nawn leh thin ang.
America leh Europe khawmualpui lam kan thlir thup a, tualchhunga mi inpe bikte chanchin leh chungchang hian ngaihsak a hlawh lo fo!
Kei chuan, nang pawh i ni tho ang, Mizo thalai tana pen chhuak thinte chanchin hi a mawi ka ti a, an che vel leh an chhehvel hi ngaihnawm ka ti tawp thei lo.
Zirna leh infiamna uar veng Khatla South kal zel rawh se – kan duhsak e.