Zirtirtu aikal la 22 la awm Sawrkarin hrem turin phut
Zirtirtu aikal la 22 la awm
Sawrkarin hrem turin phut
Mizoram sawrkarin a hnuaia thawkte aikal lak a phal tawh loh hnu ah, Mizo Zirlai Pawl-in a hriat theih chinah tun thlengin zirtirtu aikal la 22 an awm a. Kumin June 13 ralhmaa sawrkarin action a lak ngei an phut tih an sawi.
MZP Gen. Hqrs president H Lalthianghlima chuan, 2024-a MZP Gen. Hqrs. chuan sawrkar school-a thawk zirtirtu aikal la titawp turin hma lak a lo rel tawh a. Mizoram sawrkarin a hnuaia thawk ho aikal lak a phal loh avangin thlithlai reng chungin sawrkar hmalakna an ngaichang a. Sawrkar school-a aikal lak tih tawp a nih tawh thu sawi a nih rualin, khawi emawah sawrkar hmalakna zawm duhlo leh ngaipawimawh lo an awm ngeia sawi a ni thung tih a sawi a ni.
Hei vang hian kumin March 18 leh May 2-a MZP Federal Council Sitting chuan zirtirtu aikal la te chungchanga hma lak a nih theihnan report theihna an siam a. Report tur neite tan phone number tarlangin, flyer an thehdarh a. Vawiin thlengin district 6 atangin, school 14 a thawk, mi 22 aikal la report an dawng tih a sawi.
“Zirtirtu aikal la kan dap tih an hriat avanga aikal la ngam lote an awm a. Report kan dawn hnua aikal la ngam tawh lo, lo thawk lehte an awm. Tuna kan sawichhuah avanga aikal la si, thawk leh pawh an awm ngei kan ring,” MZP president hian a ti.
Sawrkara thawk tura lak zirtirtuten, lak an nih ang ngeiin anmahni ngeiin thawk se a duh a. Hlawh tha tak sawrkarin a pek, training engkim a buatsaih sakte ngeiin Pathian rawngbawlnaah ngaiin thahnemngai takin thawk se, Mizoram zirna pawhin hma a sawnpui ngei an ring tih MZP hruaitute hian sawiin, mahni eizawnna leh hlawh tam tak an hmuhna pawh rinawm taka thawk thei lo chu sawrkarin banin, thawk duh leh thawk peih la turin an ngen tih an sawi a ni.
8 Zirtirtu aikal la hi primary-ah 10, upper primary/ middle-ah 10, high school-ah 2 an ni.
8 Lai Autonomous District Council huamchhung Govt. Primary School Chamdurtlang zirtirtu 4 an awm
8 Upper Primary School Zohmun (Lunglei district) a thawk zirtirtu 4 an awm.
8 Lai Autonomous District Council huamchhung Damdep-II Middle School zirirtu 4 bawk an awm.