Zirtirtu chungchang

K. Hmingthankaia

Ziak leh chhiar thiam vekna Mizoram State-ah hian, sawrkar sikula zirna chhiatzia leh siam that dan tur engto leh buaipui aiin, zirtirtu sawn dan tur subject ringawt leh, zirtirtu sawn tum buaina vel ringawt hi a ram pumin kan engto leh kan buaina ber a ni rei ta hle mai. Sawrkar sikula zirnate, sikul naupang leh zirtirtute chungchang hi hrechianga zirchiang turin a takin ka che chhuak ve lova, TV leh Chanchinbu vel atanga lo hre mai ka nih avangin, hriat thiam loh leh buaina tam tak, zawhna ka va ngah em.. 
1. Mizoram sawrkar sikulah sikul naupang an tlem tawh hle a, zirtirtu an tam hle thung tih hi tak tak a ni em? 
2. Khawpuiah chauh pawh ni lo, thingtlang hmun thenkhatah pawh sikul naupang aia zirtirtu tam zawkna sikul enge maw zat a awm tawh tih hi tak tak a ni em?
 3. Chuti nise, engatinge sawrkar hian a khat tawka zirtirtu a la lak fo si? 
4. Sikul naupang leh zirtirtu ratio, inbuk tawkna chu a in-balance tawh lova, zirtirtu an tam tawh lutuk a nih chuan, zirtirtu chu a ban emaw, a thih emaw, a pension emawin, a post a ruah rual ruala chu post chu nuai bo, abolish theih dan a awm lo em ni? Tunah awm lo pawh ni se, a siam theih lo em ni? 
5. Zirtirtu pawl hrang hrangte hian zirtirtu post ruak tam thu leh, sawrkar chu post ruak hnawhkhat thuai tura an la nawr fo tho si hi enge a awmzia? Tun dinhmunah zirtirtute hian indaih lo an la inti cheu em ni? 
6. Zirtirtu pawl hrang hrang inhmukhawm thinte thurelah hian, zirna siam that dan tur lam hawi leh, sawrkar thu awih tura infuihna lam thurel, resolution awm ngai si lova, an hamthatna tur hlir leh post ruak hnawhkhat tura ngenna hlir an tichhuak thin hi mak kan ti em? Ni 4.7.2025 a Mizoram Teacher Federation thurel zinga pakhat erawh, ‘Sawrkar enkawl sikula thawktuten thahnemngai lehzuala zirtir ni rawh se’ tih a tel ve ta pawh hi ropui ka ti hle a. Hetiang hi kan hriat khat em avangin, he thu an rel tuk khan lawmthu sawina ka ziak nghal a, mahse, Chanchinbu lam ka pe leh si lova, mahse, Pu JT. Vanlalngheta’n a rawn ziak ta hlauh a, a lawmawm e. 
7. Zirtirtu transfer awm apianga thawm neih luai luai ziah hi eng nge a awmzia,? Kan inrawlh lohna turah kan lo inrawlh ziah nge, state dangte pawhin an ti ve tho?  Zirtirtu chauh pawh ni lo, sawrkar hnathawk sawrkarin a transfer-a mipuiin lo dan theihna dan hi a awm reng em?  State dangin an ti ve thin em? 
8. Political appointment-a zitirtu tenghneng tak tak leh zirtirtu zawmthaw tak tak lak fo ai chuan, private sikula zirtirtu taima leh thiam tak tak, discipline tha bawk si, kumtluana tang mar pat thin, hotute leh khawtlang, zirlai nu leh pate zah thiam leh thawhpui thiam bawk site hi lak zawk a tha mai lo maw? Hengho bik tan chauha recruitment siamte pawh a tha tawh mai lo maw?
9. Engtikah nge zirna siam tha ngam leh zirtirtu sawn ngam sawrkar kan neih ang le? 
    Khing thute khi thu taka lak tlak a ni em ka hre lo. Chhan tlaka ngai in awm chuan han chhang teh u le.