Zirtirtu neih loh vangin science & maths la zir lo

Zirtirtu neih loh vangin
science & maths la zir lo
Govt. Zohmun High School-ah chuan tun academic session-ah zirtirtu tur awm loh vangin science leh mathematics an la zir ve loa, khawtlangin June 13 hmaa pe tura an phut lantirna hmasa atan June 9 hian he school-a zirtirtu leh zirlai kal tur an dang dawn.
Zohmun NGO Coordination Committee (YMA, MHIP I & II, MUP, zirlai nu leh pa) thuchhuak chuan, Govt. Zohmun H/S-ah hian mathematics leh science zirtirtu nei loin hun rei tak an awm tawh a, khawtlang hruaituten sawrkar leh department hotute hnenah vawi tam an thlen tawh thin.
‘Kumin school session tan tirh atanga June thleng hian zirtirtu an neih loh avangin zirlaiten science leh mathematics subject an la zir loa, hei hian zirlaiteah a tha lo zawngin nghawng a nei ang tih kan hlau hle,’ a ti.
June 13 (Zirtawpni) hma ngeia mathematics leh science zirtirtu pek an phut tih lantirna atan June 9 hian zirtirtu leh zirlaite school kal tur an dang dawn tih an sawi a. An thil phut a hlawhtlin hma loh chu an tu leh fa, zirlaite tan theihtawp an chhuah zel dawn tih an sawi.