Zirtirtu pek belh tiam vangin
zirlaiten kawng dan an titawp
Govt Serchhip College Students Union-in zirtirtu pek belh ngiata kawng an dan chu Higher & Technical Education minister-in May thla chhunga tihfel sak a tiam nia sawiin, darkar khat hnu ah an titawp zui.
Govt Serchhip College SU hruaitute chuan, vawi engemawzat chief minister leh H&TE minister hnenah lecturer an mamawh thu an lo thlen tawh a. Kumin February 17 khan chief minister hian Geography department-ah zirtirtu nghet pahnih, Zoology-ah a nghet pakhat leh nghet lo pakhat, BCA-ah a nghetlo pakhat pek a tiam tih an sawi.
Hei hi tihhlawhtlin phutin Nilaini zing dar 8.30 atang khan college campus-ah vantlang kawng an dang a. Serchhip bawrhsap leh MZP Hqrs Serchhip hruaituten H&TE minister Dr Vanlalthlana an bia a, minister hian May thla chhungin tihfel sak a lo tiam avangin zing dar 9.30 khan an titawp zui ta tih sawi a ni.
SU hruaitute chuan tawngka mai ni lo, ziak ngei an duh thu bawrhsap bulah sawiin, an inrem thei ta a ni.
H&TE minister hian chief minister rawtna angin, academic session chhungin transfer period siam an tum tawh lo tih a sawi a. College exam a hun mai dawn a, exam zawh veleh Govt Serchhip College SU thil beisei hi tihhlawhlin a nih theihnan a theih anga hma lak a tum tih bawrhsap hian MZP hruaitute a hrilh a ni.
Zirtirtu pek belh tiam vangin zirlaiten kawng dan an titawp
Get real time updates directly on you device, subscribe now.