Zirtirtu quarters sakna tur kan dil – Education minister

School Education department chuan Finance department-ah zirtirtu quarters 120 sakna tur an dil a, hei hi finance changtu chief minister pawhin a phurpui tih School Education minister Dr Vanlalthlana chuan a sawi.
Zirtawpnia Serchhip Teachers’ Association “(STA) buatsaih Educator Enhancement Workshop neih a hmanpuinah minister chuan, Mizorama zirna siamtha turin sawrkarin kum thum chhunga hma a lak dan tur ruahmanna siam a ni tawh a. Zirna siamtha tura sawrkarin theihtawp a chhuahnaah zirtirtuten an tih tur an tih loh chuan sawrkar hmalakna a thlawn dawn a ni tiin, tang turin a fuih.
Zirtirtuten quarters an neih loh avanga harsatna an tawh dan sawrkarin a hria a, quarters 120 sakna tur an dil tih a sawi. School 50 sakthat dan tur ngaihtuah a ni a, Serchhip district-a school pawh engemawzat a tel tih a sawi a ni. Transfer and Posting Rules 2024 duan niin, zirtirtu pakhat chauh awmna school ti reh a, casual teachers-ah politics a induhsakna tel loa zirtirtu lak an nih thu te a sawi bawk.
STA Award sem a ni a. Mizoram University Exam 2024-a Department of Chemistry-a 4-na, Govt Serchhip College ami K Lalrindiki, 9-na Lalrampari bakah HSLC exam-a 7-na Goodwill English Academy zirlai Zomuansanga te hnenah hlan a ni.
Serchhip Teachers’ Association-ah hian Serchhip khawpui chhunga elementary atanga college thleng, private leh sawrkara zirtirtu zawng zawng an tel a. 1973 September 5 khan din niin, kumin hi an kum 50-na a ni. Zirtirtute hamthatna bakah zirlaite hamthatna a ngaihtuah a, Serchhip khawpui chhunga zirnain hma a sawn theihna tura din a ni.