Zirtirtu sawnchhuah avangin khaw pahnih lungawilo mek

Zirtirtu sawnchhuah avangin
khaw pahnih lungawilo mek
Govt. High School Tlabunga zirtirtu chu a thlaktu dah loin sawnchhuah a ni a, Tlabung hian lungawiloh an lantir. He zirtirtu an sawnna school Lungtian pawhin a thlaktu awm loa zirtirtu awm lai sawnchhuah sak an nih avangin lungawiloh lantir an tum ve mek bawk.
Govt. High School Tlabunga mathematics zirtirtu chu kumin May 30 khan Modern High School Lungtian (Lawngtlai district) a sawnna order sawrkarin a tichhuak a. Joint VC’s & All NGO’s Committee Tlabung chuan transfer order cancel tura an ngenna sawrkarin a tihhlawhtlin sak loh avangin Zirtawpni khan punkhawm an huaihawt.
Punkhawmah hian sawrkar hriat atana an duh resolution an siam a. Khaw dang lungawilote tuamdamna atan Tlabung hmang tawh lo turin; khaw dang avanga kang thelhna nih fo an kham tawh thu; zirtirtu sawnchhuah tum zarah Govt. Tlabung HS-in zirna kawngah hmasawnna a hmuh mek lai a, sawrkarin lakchhuah sak a tum avangin; zirlaite tawrhna sawrkarin haider lo tura duhna thu; transfer order cancel sak tura phutna; mi khua tih lungawina atana an khuaa sawrkar hnathawk lak chhuah sak tawh lo tura ngenna a ni.
Hetihlai hian Joint Coordination Committee Lungtian chuan Modern High School Lungtian mathematics zirtirtu chu Govt Aizawl High School-ah sawn a ni a, May 31 ralhmaa sawrkarin transfer order a sut lo a nih pawhin a aiawh regular maths teacher pe tura an phutna chu tun thlengin chhanna an dawng lo tih an sawi a. Hei hi khawtlang mipui zahlohna leh zirlaite hmakhaw ngaih lohna lian takah an ngai tih an sawi.
Lungawiloh lantirna atan June 10&11 ah he school-a zirtirtu leh zirlaite school kal tur an dang dawn a, hei hian awmzia a neih loh chuan June 12 atangin tiamchin awmloin BRTF kawng dan an tum tih an sawi a ni.