Zirtirtute leh zirlaite dinhmun
Zirna pawimawhzia chu kan hre tlang. Thingtlang khua zawng zawngah mipui mamawhna phuhru turin sawrkarin sikul a din zung zung thei lo. Khawtlangin anmahni sensoin zirtirtu ruaiin sikul an din ve nawk nawk a, chu chu sawrkarin a hnuah ‘sawrkar sikul’ atan a la (provincialised) ta thin a ni. Private sikul dinhmun leh sawrkar sikul dinhmun inthlauh dan chu kan hre tlang a, sawi tam a ngai lovang.
Mizoram Government Adhoc-Aided High School Teachers’ Association (MIGAHTA) ten provincialisation an ngiat mek laia sawrkarin an dinhmun pangngai aia hniama a dah chu ngaithiam lovin lungawilohna an lantir a. Sawrkarin a ngaihtuah tha leh a, school provincialise-na dan tih awlsam a, school tam zawk provincialise an nih theihnan Rules ennawn nise tih a ni ta a.
Chu lam chu a enga pawh lo ni se, zirtirtute hian anmahni hamthatna leh sikul hamthatna tur an ngaihtuah hi tihawm takah kan ngaihsak a ni thei e. Hun kha leh chen an lo hahpui ve tawhna kha, dinhmun tha zawka inhlankai an duh ve tawh a ni ber awm e.
Hetih mek lai hian, zirna awm chhan ber zirlaite dinhmun hi eng nge ni ve ta le? Zirtirtuten sikul leh anmahni hamthatna tura thahnemngai taka an beih lai hian, Zirtirtu an nih chhan leh Zirna In awm chhan ber “Zirlaite” tan hian eng anga nasain nge an beih thin a, eng anga nasain nge thahnem an ngaih thin tih hi an inzawh ve fo a va pawimawh dawn em!
Sawrkar sikul aiin private sikul exam result a tha zawk thin a, chutih laiin private sikula zirtirtute hlawh let li let nga aia tam hlawh la thin sawrkar sikul zirtirtute thawhna sikul exam result chu a tha lo zawk zel bawk si a. Sawrkar hian provicialisation atan eng criteria nge a hman tih chu azawng azain hriat ni lo mah se, a pawimawh leh a laimu ber tur, mark pu hnem ber tur chu ‘zirna quality’ hi ni thei se a duhawm hle.
Zirna sikulte hi exam result neih thatah an inel a, a tha e; chutih laiin, zirlaite mi puitling leh chhawrtlaka chher chhuak tam nih te hi inelnaah hian seng lut tawh se. Mark sâng tak tak hmu chunga an mark hmuhna an zirlai hrethiam lo leh chhawr zui thiam lo hi kan chher chhuak teuh mai ang tih a hlauhawm hle! Chutiang dinhmunah chuan kan lo awm mek tawh zawk te hi a ni lo maw?