Zirtirtuten tunlai thil thleng ngaihven ang – Education minister

Zirtirtuten tunlai khawvelah enge thleng, tih ngaihvena kan inchhiar var a, kan hriatna chu zirlaite kan pek chhawn ve leh a ngai tih School Education minister Dr Vanlalthlana chuan a sawi.
Mizoram Samagra Shiksha-in interactive flat panel, GEM kaltlanga a lei chu School Education minister ho hian Nilaini khan sem a ni a. Interactive flat panel chu sawrkar hmasa hunlaia sem tawh chhunzawmna a ni tih minister hian a sawi a. Zirnaah khawvel technology changkang zel milin kan kal ve thei tur a ni, tiin, “Zirlaite hian hna an zawn hunah tunlai technology nen an inel tawh dawn a, chuvangin zirlaibu bakah zirtirtute pawh tunlai khawvel mila kan inher rem ve zel a ngai. Tunlai khawvelah hian enge thleng, tih ngaihvena kan inchhiar var a, kan hriatna chu zirlaite kan pek chhawn ve leh a ngai a ni,” a ti.
Classroom-a zirtirna chu smart board hmangin audio visual mode-a kalpui theih a lo ni ta tih Dr Vanlalthlana hian a sawi a. Zirtirtute chu naupang an zirtirnaah a tam thei ang ber hmang tangkai turin a chah. Zirtirtute chu naupangte zirtirna kawngah khalh luh tumna, goal nei tur leh chumi mila kal thin turin a fuih bawk. Zirna in hma a sawn theihnan zirtirtute chuan lesson plan an siam pawh a ngai dawn tih a sawi a ni.
Interactive flat panel hi school 13 – Govt Chaltlang High School, Govt Hrangchhuana H/S, Govt Pianghleia H/S, Govt Sihphir H/S, Govt KVM H/S, Phunchawng RMSA Secondary School, Govt MICE H/S, Govt JL H/S, Govt Central H/S, Govt Kulikawn H/S, Govt Sialsuk HSS, Govt Republic HSS leh Govt Republic H/S hnenah sem a ni.