ZMC-ah a verha verhin Pancreas cancer an zai

ZMC-ah a verha verhin Pancreas cancer an zai
Zoram Medical College & Hospital Falkawn-a Department of Surgery leh Association of Surgeons of Mizoram tangdun buatsaih ZMC&H-ah ril leh pum lam (gastroenterology) zirho leh surgical workshop chu Thawhlehni khan neih a ni a. Mizoram-a a hmasa ber turin Pancreas cancer chu verh (laparoscopy) in zai a ni.
Gastroenterology zirhonaah hian Manipal Hospital, Salt Lake Kolkata atanga lokal doctor-ten pancreas cancer hi an khawih a. Medical gastroenterologist (Gastro & Liver Clinic) Dr Benjamine Khiangte nen tangdunin Endoscopic Ultrasound (EUS) chu a mamawh damlo mi 8 tan a thlawna tihsak an ni bawk.
EUS hi Mizoram sawrkar hospital-a an vawikhat tihna a ni a. ZMC&H doctor-te chuan EUS hi khawl tangkai tak a ni a, Mizoram pawna damlo thenkhat refer ngaih chhan a la nih avangin mipui tam zawk ban phaka sawrkar hospital-a neih ve theih hunah chuan harsatna tam tak a sutkian ngei an beisei tih an sawi a ni.
Workshop hi zan lamah CME (seminar) in chhunzawm a ni a. Gastroenterology lama hmasawnna leh Mizoram hmachhawp an sawiho. Mizoram surgeon hrang hrang leh ZMCH lama doctor-ten an telpui.