ZMC-ah thin leh mit cancer zai

Zoram Medical College-in hma a sawn zel a, Mizorama tih theih ngai loh zing ami thin (liver) cancer leh mit (gallbladder) cancer chu hlawhtling takin an zai thei tawh.
ZMC hotute sawi danin, mit hi thin (liver) ah a bei avangin mit cancer-ah hian mit bakah thin engemawchen (segment 4B&5) paih tel a ngai thin a. Hei hi ZMC-a Hepatobiliary surgery an zai tanna a ni. General Surgery department hnuaia zai leh enkawl niin, ICU leh hnimhlum lam, Anaesthesiology department leh department dangte nen tangtlanga enkawl a ni.
Tunlai khawl changkang tak tak an neih ho hmang thei doctor-te an inzir thar nasa a, thin cancer zai chungchangah pawh hian Tata Memorial Hospital Mumbai-ah an zu training a. CanCancer-ah rau rau pawh zai harsa leh huphurhawm, an tih thin leh Mizorama la zai ngai loh – thin (liver) cancer zaipui (major liver resection) an ti thei ta a ni.
Thin vei lam pumpui paih (left hepatectomy) a ni a. Thin vei lam chawmtu thisen zampui hrang hrang uluk taka lak a ni. Thin atang mit (gallbladder) tui luanna (left hepatic duct) chu uluk taka tawn a ni bawk. Thin zai hi a thi duh em em a, thisen zam a tam avangin a hlauhawm bik tih an sawi.
Khawl changkang tak, water jet (tui phuh chakna hmanga inzaina) hmangin thin cancer hi an zai a, hei hian nasa takin surgeon-te a pui tih sawi a ni. Thisen chhuak nasa lutuk tur vengin zai dan chin tur hmuh a ti awlsam a, argon gas hmang – Argon Plasma Coagulation khawlin thin zai tawh lai chu an kap sawr leh a, hei hian thi put tur a veng a ni.
Hlawhtling taka thin cancer zaitu team hi, ZMC Department of Surgery-a associate professor Dr Samuel Lalhruaizela (surgeon) leh assistant professor Dr Willie Lalhruaitluanga (assistant surgeon) an ni a. An ni bakah hian junior doctor leh nursing staff-ten an pui a, ICU lamah Anaesthesiology team-in damlote hi uluk takin an enkawl bawk.