ZMC&H-in NQAS certification platinum category-a tlin a lawm
ZMC&H-in NQAS certification
platinum category-a tlin a lawm
India rama sawrkar damdawi in tha bik tehna, National Quality Assurance Standards national certification pek tak Zoram Medical College & Hospital chuan Zirtawpni khan an lawm a. Hemi rual hian Mizoram Universal health Care Scheme hnuaia thuam thar private cabin leh ICU khum dah belh hawn a ni bawk.
India rama sawrkar hnuaia damdawi in tha bik, tehfung hrang hranga endikna point chi 5000 chuang hmanga a endiktu mithiambik tena an endik thin National Quality Assurance Standards (NQAS) assessment chu ZMC&H chuan kumin March khan a hmachhawn a, mark 92.89% hmuin NQAS certified hospital-a puan a ni.
A hospital pum anga he lawmman hi dawng an nih bakah nau neihna lama hospital tha bik (LAQSHYA) certificate pawh dawngin, nau neihna ward labor room chuan 92.88% a hmu a, nau neih zaina room – maternity OT chuan 98.26% a hmu. Naupang leh naute enkawl kawnga damdawi in tha bik tehna (MUSQAN) certificate an dawng bawk a, 92.80% a hmu. Heti hian ZMC&H chu endikna result-a a sang ber – platinum category ah a tling vek a ni.
MUCHS hnuaia ZMC&H-a hawn thar hi private cabin 30 niin, a hmaa awmsa room 10 nen, tunah 40 a awm ta a ni. ICU khum 13 dah thar a nih bakah ward hrang hrangah khum engemaw zat dah belh a ni bawk.
Hmanpuitu Health minister Lalrinpuii chuan Mizoram Health System Strengthening Project (MHSSP) leh World Bank tangdun project hlawm lian pakhat, Internal Performance Agreement (IPA) chu sawrkar damdawi inten kum 5 chhungin kum khatah vawi 4, an thawh that dan azirin sum an dawng thin a. He sum hmang hian sawrkar damdawi inten quality lamah hma an la a, NQAS certification an neih theihnan IPA ngawrh taka kalpui a ni tih a sawi.
MHSSP hmalaknaa Mizorama sawrkar damdawi in 42-in NQAS national certification an dawng thei ta leh, ZMC&H-in a sang ber – platinum category-a an certify tel chu ropui a tih thu a sawi a ni.
NQAS leh IPA assessment atana hospital doctor, nurse leh staff dangte an thawkrimin, damlo enkawl piahlamah a ziaha ziahfel ngai, hna hautak tak tak an bawhzuina, funding beitham tak karah hmanraw tha lei a, damlote hnenah service tha thei ang ber pek tuma rilru leh tha an seng chu a hlu in, mipuiin an dampui zel a beisei tih a sawi bawk.