Dr. Lalsiamhnuna
Ph. 8131822506
-- Advertisement --
‘A thawh tlai palh takin’ tiin zing dar riat (8:00 AM) ah ka phone a, chuti chung pawh chuan, mu chungin, phàk tawkin min la chhang. Amah lah chu mi pangngai chung lam, thalaite tan pawha entawn tlak, role model ni hial awma mawi lah ni. Nu tling pakhat ka phone leh; chu nu phei chu a phàk leh zual. “Nakinah le….” ka ti a, ka dah tawp. Ka va han mawl tak! Phone hman hun tur leh tur loh te chu hre hrang rual ka ni tawh a sin maw le!!!
Khawvel hmasawnna-in min tuam a, kutphah tiat lek, Benghup-Biak hnaih, mobile phone han kheuh hawna khawvela thil zawng zawng hmuh leh biak theihna huna kan chuan kai mek tawh avang hian zing dar ruk, dar sarih te chu tun hma zan dar khat, dar hnih ang lekah kan ngaiin kan zanlai hun hman ta chiah chiah mai zawng a nih ber tak hi maw!!! Zing ni chhuak leh zingkar hun tha hmu ngai reng reng lo kan pung tual tual. Zah nachang hriat chu sawi loh, kan la intithei zawmah leh ta nghal. Chumi nghawng chhuah ni awm tak vitamin D tlakchham avanga natna khirh pui puiin a tlakbuak ta te pawh hmuh tur an kat ta nuk mai.
Kan Baibul chuan, “Muhilte chu zanah a ni an muthilh thin ni (I Thess 5:7)” a tih laiin mi tam tak chu zing khawvar hnu-ah pawh rei tak tak kan la mu a, Pathian pawlna leh boruak tha hipna tur hun tha zawng zawng kan bawh bo thin. Hei hi dawng dahna leh tlakranna kawng hlauhawm takah a chang thei.
Thufing 6:9-11
“Aw thatchhepa, eng chen nge i mut dawn?
Eng tikah nge i muhil chu i thawh dawn?
I duh chuan mu hlek la, chhing hlek rawh,
Kut kuangkuahin chawl hlek teh;
I mut hlanin i rethei hman anga,
Tlakchhamnain sipai angin a rawn nang thut ang che,” a ti
Chu lo pawh (Thufingte 20:13):
“Mut thlahlel suh, i lo pachhe dah ang e;
I mit meng la; tichuan, chhang kham khawp i nei dawn nia,” a ti bawk.
Zing thawh hma leh taihmakna chuan hlawhtlinna a hring a, chumi lehlam chiah, zing thawh tlai leh thatchhiatna chuan tlak ranna a hring thung.
‘A khai a! Chu ti teh tawp te chu a tunlai tawh lo em mai. Mi tin kan buai tawh a, zan lama hnathawk pawh mi tam tak kan awm tawh a, zan men rei leh zing thawh tlai te chu Smart phone leh Computer khawvel hrin chhuah a nih tawh hi, tunlai ve deuh teh,’ min ti a ni mai thei. Ka pawm thlap. Mahse maw, ram pum huapa pawng thawh tlai viau vek rikngawt hi a fuh dawn lo tlat. Kan mikhual chamrei hnam dang – ‘vai chhia’ kan tih thin te khan, chhang an kang a, puak an phur a, mutia –ah tangin, cement an chawk bawk a, kan muthilh hlanin sum tam tak tak an lo thawk chhuak hman thin. Mut rei leh thawh tlai hi kan hnam tan a la pawi dawn. Kan Zo-Puakphur (Mizo mutia) te kha khawnge an awm zawh tak? Ka hmu ta reng reng lo mai. |an lak thar a va tha ve. Han tang sauh sauh teh u khai. Kan khawtlang nun leh Pathian biak kan kalpui dan atanga chhut pawhin, hun inang tlang (ni khatah darkar 24 theuh) Pathian min pek hi kan inhman tangkai hleih dawn chiang khawp mai. Zing tawngtai inkhawma kal thin nu leh pa, upa lam, mi tlemte bak chuan ‘Ni chhuak eng mawi tak’ hi kan hmu khat tawh khawp mai.
Zingkarah hnatlang a koh theih meuh tawh lo, tul tawpa koh a nih chang pawhin thawk chhuak thei aram kan awm ta meuh lo. Inkhawmpui nikhuaa Bible Study- zingkara neih thin pawh hi a hlawhtling nep thin khawp mai. A mamawh mawh a kal hman lovah an tang ti ila kan sawi sual tam vak lo mai thei. Zing thlan laih lek phei chu kan harsat leh zual tawh. Zo nun ze mawi-tlawmngaihna zawi zawia tlawm sanna a ni thei hial em le? Pastor leh Upa te ‘bial chhung in tin tlawh thinte’ pawhin thalai (nula leh tlangval) te hmel hmu lovin kum an tluan ta fo mai. ‘A ni em em tawh lo ve..’ ti a, chhung kaw tin te hmel hmuh kim hram tuma tan an han lak lahin Chawma inkhawm an tlai phah leh zel bawk si. A damdawi chi khat atan ti ni awm takin Pathianni Chawhma Inkhawm hun tihtlai (Dar 10:30 AM, thenkhat phei chuan Dar 11:00 AM) rawt lamah an ram tang ta ringawt a. Khawpui leh thingtlangah Pastor Bial tamtakin Pathianni Chawhma inkhawm an titlai ta sup sup mai. Fuh tak maw!
Pawi ta em em mai chu: Tlemlai deuhva Sawrkar ruahmanna tha lutuk – SIKUL |AN HMA duh lova kan hnawl tak kha a ni. Han kal tlang ngat seng chuan nu leh pa zawng zawngin thawh hma kha ngaiah kan nei ang a, zirlai zawng zawng an tho hma ang a, an lo hrisel zawk bawk ang. Kan ram zirnain hma a sawn chak phah ngei ngei dawn tih kha a lang reng. Kut hnathawk mite tan lah a tha hlei hlei, zing daiah an thawk teuh hman dawn tlat. Kha Sikul tan hma an hman chhung hun rei lo te pawh kha nu leh pa tam tak chuan an that phah hman a sin.. An tho va, an walk a, an inkhel a, hna an thawk teuh hman. Traffic jam lah a ziaawm phah em em bawk si. Beng sikin i ngaihtuah nawn leh ang u.
Ka tawng tu’n lo haw lo se, mut thlahlel nu ho (ka ti mai) sawrkar ruahmanna dodala an han che tak tak kha chu, an nasa teh a sin, sawrkar tan pawh khan han palzam mai mai chi lah ni hek lo, Eptu Party-ten hnung lamah an lo fuih char char bawk nen. ORDER kha sut loh theih lohvin sawrkar kan siam a nih kha (ka hre sual em lovang chu maw). Khatiang thil, ram tana tha tur kha chu politicised tawp loh tur kha a ni a le. Tuna kan hrawn mek ZPM, Kalphung Thar Mipui Sawrkar zuartu hian he lam hawi ruahmanna hi a siam leh ngam ang em le? Siam leh ngam pawh ni se, mut thlahlel ho hian, kan duh leh lo tho vang nge, kan zawm tha phian tawh zawk ang aw? Ram tana tha turah hi chuan Ruling leh ‘ling lo lam ngaihtuah lovin tang tlang thei hlawm thin ila chuan, ram hmasawnna kawngah kan kal chak ni mai tur lah ni.
Kan rama tun hnaia chin thar: Sawrkar hnathawkten hna an thawh that theih nana sawrkar thar ruahmanna: Biometric Attendance System (BAS): KAI APP (an ti emaw ni) thatzia te hi sawiin a siak lo. Sawrkar hnathawkten hun an vawng dik a, Office dawrtute tan lah kal thlawn a tlem phah bawk si. Hlep hlang a ni ringawt. Tuman sawi sel tawh lovin, i thlawp tlat ang u. Office dawr reng kan awlsam phah.
Hawh u! kan ram hmasawnna tichak zual tur leh hnam taima, hrisel leh harh vang kan lo nih zel theih nan ZING THAWH HMA i zir theuh vang u.