Zo hnahthlak raltlan 30000 dawn la enkawl

Manipur-ah Zo hnahthlakte leh Meitei an
intihbuai avangin mi engemaw zat Mizoramah an tlanchhia a, Manipur state chhungah pawh mi engemaw zat tlanchhia an awm. Churachandpur district-ah Zo hnahthlak raltlan mi 30000 dawn an la awm.
Lamka khawpuiah deuh vek an awm a, Lamka atanga thu dawn danin, an tam ber lai chuan mi 40000 chuang an ni. Tun hnaiah an tlem ta deuh a, 30000 tling lo deuh an ni ang.
Churachandpur district-ah hian Zo hnahthlakte awmna district dang atangin an tlanchhia a, Kangpokpi district, Chandel district-a mite leh Imphal-a mite an ni ber.
Sikul leh community hall-ah an awm ber a, khawtlang mipuiin lo dawngsawngin an enkawl a ni. Tunah chuan Manipur sorkarin Food Security Act hmangin an eitur a pe tawh.
Sikul leh community hall atang hian mipuiin engemaw zat chu in luah tur an ngaihtuahsak a, in luah man an tumsakte an awm. Hna tur te pawh an ngaihtuahsak a, chutianga an tih avang chuan a tir lam anga engkim ngaihtuahsak ngai ang kha an ni vek tawh lo tih thu dawn a ni.
Sikul-ah mi engemaw zat an la awm a; sikul an tan tawh avangin, tlanchhiate awmna sikul-ah chuan class lakna tur pindan an siam rem a ni.
Manipur boruak hi a dai ta deuh a, mahse silai puak ri hriat tur chu a la awm. Meitei hnaih Zo hnahthlakte khua chu inralring rengin an la awm a, mahni khua vengin chhun zan zawmin an la duty. Meitei hnaih khuate hi chuan eizawnna lam an la ngaihtuah thei lo a, khaw dang pawhin theihtawp chhuahin an la pui a ni. MHIP-in tun hnaia puihna an thawn pawh Meitei hnaih khuate tan Zo hnahthlak pawl hruaitute’n an lo sem tih thu dawn a ni.