Zo hnahthlak te’n Meitei um kir

Zo hnahthlak te’n Meitei um kir
Manipur-a Kangvai khua leh a chhehvelah tunlai hian Zo hnahthlakte leh Meitei an inkap a, Zo hnahthlakte hian Meitei engemaw zat an um kir tih thu dawn a ni.
Manipur atanga thu dawn danin, Kangvai vela an inkahna atangin Zo hnahthlakte hian tun hnaiah Moirang thleng an um kir a, Moirang khuaa nunau chu an lo insaseng hman.
Kangvai hi Imphal lam atanga kalin Churachandpur district luhka, a khaw hmasa a ni a, Moirang hi Meitei khua niin, Bishnupur district a ni a, Kangvai atang hian km 10 vel a ni.
Kangvai hi Vaiphei khua a ni a, khaw inzawm titihin Zo hnahthlak khaw hrang hrang an awm. Vaiphei, Hmar leh Kuki te an awm a, an buai tirh atangin Kangvai leh a chhehvelah hian ngawrh takin Zo hnahthlakte an ‘duty’ a ni.
Zo hnahthlak lam chuan Meitei-te hi Churachandpur district luhchhuah tuma che an nih an rin loh thu an sawi a, an inep rei tawh a, an thinrim inhrithla a nih an rin thu an sawi. Meitei lam an che hmasa tih an sawi a, chu chu an kap let ve chauh tih an sawi bawk.
Kar hmasa Inrinni vel atanga inkap an ni a, Zirtawpni thlengin an la inkap. Manipur atanga thu dawn danin, inkap bur bur leh chhum lo chat lova inkap char char an ni lo a, mahse silai puak thawm hriat tur a awm deuh reng. Zing, chhun zanah silai puak ri hriat tur a awm a, Meitei lam hian bomb an hmang nia sawi a ni bawk.
Manipur-a Zo hnahthlakte intelkhawmna Indigenous Tribals Leaders Forum (ITLF) lamin an puan danin, tuna Kangvai leh a chhehvela an inkahnaah Zo hnahthlak lamah pakhatin nunna a chan a, hliam tuar pathum an awm. Meitei lama nunna chan zat hriat a har a, thudawn pakhatah chuan panga paruk vel an ni ang tih a ni.