ASF hrileng zia telh telh

On Jul 29, 2023 7 0

ASF hrileng zia telh telh
Hri leng mek African Swine Fever (ASF) a zia telh telh a, vawk a thih tlem telh telh bakah a lenna hmun thenkhatah chuan hri hi a reh tawhah ngaih a ni.
AH&Vety department hotute chuan hri hi a hma angin a nasa lo hrim hrim a, a zia telh telh bawk tih an sawi. Vawk hi hmun thenkhatah a la thi a, mahse hri luhna hmasaah hri hi an hup bet tawh nia an hriat thu an sawi.
AH&Vety department-in an chhinchhiah danin, July ni 28 thleng khan Mizoramah tun hrileng mekah vawk 242 a thi tawh a, vawk 277 tihhlum/suat a ni tawh.
July ni 28-ah hian Lunglei district-a Pukpui-ah chiah vawk thi report a awm a, vawk paruk a thi. Pukpuiah hian a hmain vawk 10 a lo thi tawh.
Tun hrileng mek tuar hmasatu Champhai district-ah a zia tawh a, Aizawl khawpuiah pawh a reh tawhah ngaih a ni.
Tun hrileng hi May thlaa intan a ni a, finfiah hmasak ber chu May ni 6-a mi a ni. Champhai, Kolasib, Aizawl, Mamit leh Lunglei district-ahte finfiah a ni tawh a, Lunglei district hi finfiah hnuhnun ber an ni.
2021-ah khan ASF hi Mizoramah hmuh a ni a, kum tir lam atangin 2022 February thlengin he hri hi Mizoramah a leng. 2022-ah hian a thawh hnihna a leng leh a, December ni 22-ah a tawp tiin an chhinchhiah. Tuna leng mek hi a thawh thumna a ni.