Zo hnahthlakte leh Meitei inkap nasa leh

Chawlhkar hnih vel an boruak a dai deuh a, chumi hnuah a sa leh; ni thum chhung chu nasa takin Manipur-a Zo hnahthlakte leh Meitei an inkap ta.August ni 29, Thawhlehni khan Churachandpur district-a Khousabung velah Zo hnahthlakte leh Meitei hi nasa takin an inkap a, Kangvai vel a kangkai, Chandel district-a Sugnu-ah an inkap bawk; hmun ngaah nasa takin an inkap mek tih thu dawn a ni.
Thu dawn danin, Khousabung area-ah hian hmun li-ah an inkap a, a hmaa an lo inbeih nasat tawhna Kangvai pawh a tel. Buai tirh lama an inkah nasatna Sugnu velah an inkap nasa bawk.
Lamka atanga thu dawn danin, Ningani tlai lam thleng khan hriat theih chinah Zo hnahthlak lamah mi 12 velin hliam an tuar tawh a, pathumin nunna an chan tawh.
Thawhlehni-a an inkah khan pakhatin nunna a chan a, Nilaini-a hliam tuar pahnih, Aizawl lama enkawl tura phurh tumte’n Ningani-ah nunna an chan leh a ni.
Hliam tuar pakhat chu Aizawl pana kalpui a nih laiin, Manipur an chhuahsan hmain kawng lakah a boral a, pakhat chu Ningani chhunah khan Aizawl panpui a nih hmain a boral a ni.
Churachandpur district-a Zo hnahthlakte intelkhawmna Indegenous Tribals Leaders Forum (ITLF) hruaitute chuan a hma ang bawkin Meitei lamin an bei hmasa leh tih an sawi a, buai hnua an inkah nasatna pawl tak a nih an rin thu leh, hetianga a ruala hmun ngaa inkah a la awm loh thu te an sawi bawk. Kangpokpi lam chu an boruak a dai rih nia an hriat thu an sawi bawk.
ITLF hian fimkhur thu-ah Lamka khawpuia dawr zawng zawng khar tur an ti a, inkahna hmuna intirh belh a tul bakah hliam tuarte phurh an ngaih thin avangin, khawlai pawh lun lo se, kawngpui tawt lo se an duh tih te an sawi.
Zo hnahthlak lam chuan Meitei hi an thawk ripin hmanrua pawh an nei tha tih an sawi a, police commando leh IR te’n hma an hruai a, an hnungah mipui; Meitei nuhovin commando leh IR te an lo dang a, chutih karah chuan an hnunga mipuite’n Zo hnahthlakte an bei thin tiin an sawi. Nuho hian lem an lo chang thin tih an sawi.