Zo hnahthlakte’n vote tur la hre lo

Lok Sabha inthlanpui lo awm turah Manipur-a Zo hnahthlakte chuan vote tur an la hre lo a, ngaihtuahna an seng mek tih thu dawn a ni.
Thu dawn danin, Manipur-a Zo hnahthlakte zingah hian vote thlak loh ai chuan NOTA hmeh mai rawtna a awm a, mahse he ngaihdan hi a inthlak leh. NOTA an hmeh hian Manipur chief minister Biren Singh-a leh a pawlte tan a lawmawm zawk dawna an hriat avangin NOTA hmeh loh tul tihna a awm.
Manipur-ah hian seat hnih an nei a, inner Manipur chu Meitei chan niin, outer Manipur chu Scheduled Tribe (ST) tana hauh (reserve) a ni. ST tana hauh outer Manipur-ah hian Zo hnahthlak te, Naga te leh an zinga cheng ve Meitei, Bengali, Muslim leh Nepali te’n vote an nei.
Outer Manipur-ah hian Zo hnahthlak leh Naga an intlin chhawk a, Naga hian vote chu an ngah zawk. Tun tum inthlanah hian Zo hnahthlak candidate an awm lo. Candidate pali, Naga vek an awm a, NPF leh Congress candidate-te leh independent ticket-a ding pahnih an awm.
“Mipui hi kan phur lo a, vote thlak pawh kan phur lo. Inthlang tur pawh kan ang lo,” Zo hnahthlak hruaitu pakhat chuan a ti.
Thu dawn danin, Zo hnahthlakte hian tunge an vote ang tih thu-ah rilru an seng a, hruaitute thu an ngaichang bawk.
Zo hnahthlakte district lian pahnih Kangpokpi leh Churanchandpur district-ah chuan Zo hnahthlakte hawi lam a inang lo mai thei a, district pahniha mite hi an inlungrual loh vang ni lovin an dinhmun a inan chiah loh vang a ni tih thu dawn a ni.
Zo hnahthlak hruaitute pawhin ngaihtuahna an seng mek tih thu dawn a ni a, Zo hnahthlak MLA 10-te pawh Zo hnahthlakte dinhmun thlirin an ngawi rih tih thu dawn a ni.
Outer Manipur-ah hian Lok Sabha inthlanpui lo awm turah hian Naga voter 4,68,532, Zo hnahthlak voter 3,21,199 leh Meitei leh a dangte 2,51,218 an awm.