Zodi Hlunmawii a chawl ta

Zofate zinga zaithiam lar, hranghlui chan chang ve ta Lalhlunmawii chu Zirtawpni khan Tahan-ah a boral.
Lalhlunmawii hi Zofate zinga band lar hmasa Zodi-a an vocalist thin a ni a, Zirtawpni chhunah khan kum 68 mi niin Tahan-ah a boral a ni.
Tahan atanga thu dawn danin, Myanmar chhun dar 12 vel, Mizorama dar 11 velah a boral a, zanah tlaivarpui niin, Inrinni-ah vui liam a ni ang.
Tahan bul Varpui khuaa piang a ni a, Zakapa leh Hauhmingi te fa paruk zinga naupang ber niin, 1957-ah a piang a ni. Tahan vela seilian a ni. Tun hnaiah Aizawlah a awm tam a, Khampat lama awm chang te pawh a nei. Tu mawng beng tawh a ni a, a fanute pahnih USA leh Malaysia-ah an awm; fanu pahnih leh fapa pakhat a nei a ni.
A hun hnuhnung lamah a bawrhsawm a, zunthlum natna avanga inenkawl ngai a ni. A boral chhan hi kal lam tha lo vang a ni tih thu dawn a ni. Tun hnaiah damdawi inah a lut ngun a, Wesley damdawi inah tun hnaiah vawi kua a lut. February ni 27 khan damdawi in atangin a chhuak a, in lamah theihtawp chhuaha a inenkawl laiin March ni 20-ah a chawl ta a ni.
Naupang te a nih laiin zai lamah a inhmang tawh a, 1971 khan ‘Hla ruai ropui’ intihsiakah pakhatna a ni. Chung lai chuan kum 12 mi a ni a, a nulat hnuah pawh inhmangin Zodi-ah a tel ta a ni.
Lalhlunmawii telna, band lar hmasa Zodi-ah khan vocalist pakhat aia tam a awm a, an album hmasa leh lar ‘Phengpheleng leh Rose par’ tih, 1980-a an siamah khan Lalhlunmawii hi a zai berah a tang. Zodi vocalist dang Thangluaia nena an sak dun ‘I pen zel ang’ tih pawh a lar a, ‘Dam lai pialral’ tih te, ‘Chun leh zua’ tih hlate pawh a larpui hle. Lengzem hla leh Gospel hlate a larpui ve ve a, 80s velah chuan hmeichhe zaithiam lar ber pakhat a tling.
Myanmar-a Zo hnahthlakte zingah ngaihsan leh ngainat a hlawh a, nu pawimawh a tling. Zaithiam a nih bakah mi rilru tluang a nih avangin mi ngainat a hlawh an ti. Tahan-ah hian Methodist Kohhran, Mission Vengah an lawi a ni.