Zofate ruang Lamka thlenpui ta

Manipur-a CRPF te kah hlum mi 10-te ruang, Silchar-a post mortem tihte chu Inrinni tlaiah khan Lamka khawpui phurh thlen a ni a, Lamka-ah hian District Hospital-ah dah a ni. Mi 10-te hi Zo hnahthlakte niin, November ni 11 khan Manipur-a Jiribam district-ah CRPF te’n an kaphlum a ni.
Silchar Medical College-ah post mortem tih a ni a, November ni 14 tlaiah khan zawh fel ni mah se a tukah pawh ruang hi lak chhuah theih a ni lo. Ni 16-ah lak chhuah a ni ta chauh a, helicopter hmangin Lamka panpui nghal an ni.
Lamka-ah hian helipad atangin mipuiin an lo hmuak a, mipui pungkhawm hi an thahnem hle. An inah theuh luhpuia a zanah tlaivarpui tur tiin lo rel lawk mah se post mortem report an hawn tel loh avangin District Hospital-a mitthi dahna inah dah an ni.
An ruang awmnaah hian mi engemaw zatin an thut chilh a, ruang enna hun pawh rei lo te chu an hawng.
Ruang lak chungchangah hian harsatna nasa tak an paltlang a, Mizorama lakluha chuta tanga Lamka hi panpui tum phawt a ni. Inhnialna karah helicopter hi hman a ni ta a ni.
November ni 12 zanah Silchar-ah post mortem tih tan niin, zanlai thlengin ruang paruk an zo a, a tuka chhunzawm leh tura tih a nih laiin Manipur sorkar, a hma zawnga ngawi khan Mizoram luhpui an duh lo a ni ang tih turin a tukah hian ruang hi helicopter-a lakluh tur an ti ta thut a, post mortem pawh Manipur-a tih tur an ti. Silchar-ah hian Zo hnahthlakte leh ruang awm chilhtu Manipur Police pawh an innawr zeuh zeuh. Ni 14 chhunah post mortem chu chhunzawm niin, tlaiah zawh fel a ni a, mahse ruang lak chhuah theih a ni ta chuang lo. Manipur Police te’n lak an tum a, Zo hnahthlakte’n hei hi an lo dang thin. Manipur sorkarin ruang hi DNA lak tur te a ti leh bawk.
November ni 16-ah ruang hi lak chhuah a ni ta a, hemi ni pawh hian police te leh Zo hnahthlakte an innawr leh. Silchar atanga thu dawn danin, Zo hnahthlak lamah hian hliam tenau tuar an awm nual a, hmeichhia pawh pali velin hliam tenau an tuar.
Ruang hi helicopter hmanga lak tura pawm fel a ni ta a, Jiribam additional SP-in ruang hi Imphal luhpui lovin Lamka panpui nghal a ni ang tiin a tiam a, Cachar SP-in a hriatpui bawk. Zo hnahthlakte pawhin an remti ta a ni.
Medical College-ah hian hunserh te an hmanpui phawt a, chhun dar 1.15 velah lak chhuah an ni ta a ni. Tlai dar 3 pelhah Lamka thlenpui an ni.
Imphal lamah Meitei an buai nghal a, an MLA in te pawh an bei. Manipur atanga thu dawn danin, MLA paruk vel chenna in beih a ni a, minister pakhat pawh beih zingah hian a tel. Imphal-ah hian internet pawh tihtawp nghal a ni.
Jiribam district lamah Meitei an che bawk a, Zo hnahthlakte khua an bei a, hriat theih chinah biak in panga leh mimal in pariat leh petrol pump te an tichhia. Chawlhni lamah erawh thil duhawm lo lian tham a thleng zui lo nia hriat a ni.
Jiribam district hi Zo hnahthlakte leh Meitei inkar boruak so thar lehna a ni a, November ni 7 khan he district-a Zairawn khuaa cheng Zosangkim Hmar chu Meitei-in rawng takin an tihlum a, hei hian hnam pahnihte kar a tilum leh a ni. Silchar-a post mortem tihte pawh hi Jiribam district-a kal an ni a, an haw lamah CRPF te’n lo lambun-in an kaphlum a ni.