Zofate thlavang hauh kawngzawh nei dawn

Zofate thlavang hauh
kawngzawh nei dawn
Manipura Zofate thlavang hauh leh tawrhpuina kawngzawh chu vawiin, July 25 hian Aizawl leh Mizoram hmun dangah neih a ni dawn.
NGO Coodination Committee huaihawt kawngzawh neih tur hi Aizawlah chuan chhim lamah Kulikawn leh hmarlamah Chanmari atanga zawh tan tur a ni a, Raj Bhavan hmarlam gate ah an intawkkhawm ang. Chhim lam atang hian veng 40, hmar lam atangin veng 68-in an zawh tan dawn a ni.
Mizoram DGP Anil Shukla chuan kawngzawh neih tur chu muanawm taka neih a nih a beisei tih a sawi. Police lamin venhimna lam tha taka kenkawh an tum tih a sawi. Traffic SP chuan Aizawla kawng zawh anih dawn avang hian Thawhlehni chawhma dar 10.00 atanga kawng zawh programme zawh fel hma chu lirthei tlandan tih danglam leh parking hmun tihdanglam a ni dawn tih a sawi lawk a. Chanmari to Kulikawn inkar main road leh a bulvela pawhna kawngpui sirah tumahin lirthei dah lo turin mipui a hriattir.
Political party tin ten kawng zawhnaa an party mite tel tur an inchah a, MPCC, MNF, ZPM leh BJP chuan kawng zawh chhan an thlawp zia lantirna’n party office an khar dawn tih an puang.
Aizawl City Bus Owners Association chuan kawng zawh chhan an thlawp zia lantirna’n kawngzawh programme hman chhungin Aizawl khawpui dunga city bus service an chawlhtir dawn a. Sakawrtuichhun, Ainawn leh Sihphir lam erawh a pangngaiin an service thei anga, kawng zawh zawhah kawng zawhtute haw leh na tur hisapin, an service chhunzawm dan tur an ruahman lawk a ni.