Zofaten fa kan ngah a ngai Pun hi sawrkar policy a ni – Lalduhoma

Zofate kan tam theihnan fa kan ngah deuh deuh a ngai tih chief minister Lalduhoma chuan a sawi a. Pun chu sawrkar policy a nih angin, fa pathum leh a aia tam nei nupa chu sawrkarin hamthatna siamsak hial an rilruk mek tih a sawi.
West Phailenga Lalbuanga Runah Mizo Zirlai Pawl buatsaih Zofest 2024 neih a hmanpuinaah chief minister chuan, kan ram chu ram dangte nena khaikhin chuan density of population a la hniam a, mihring tam zawk chenna tur ram kan la nei a. Chutih laiin Zofate kan tam a ngai a, fa kan ngah deuh deuh a tul. Pun hi kan sawrkar policy a nih avangin nupa, fa pathum leh a aia tam nei chinte hamthatna duan hial an rilruk tih a sawi a ni.
Zofate kan inpumkhat deuh deuh tih hmuh theih a ni tih sawiin, mipui chauh kan inpumkhat loa, kohhran thlengin Mizoram chhung leh ram dangah Zofate kan inpumkhat deuh deuh tih a sawi. “Chin Hills-a kan unaute inpumkhata an awm theihnan ka ho ngeiin vawi tam kan thukhawm tawh a, a umzui tur bik pawl pawh kan din a ni,” a ti.
Mizote chu tunah hian khawvela hnam damrei lo ber zing ami kan nih a rin thu Lalduhoma hian a sawi a. Thalai thi kan ngah lutuk a, a bikin ruihhlo vanga thihna a tam tih a sawi. “Kan insiamthat ngei ngei a ngai. Thalaiten ruihhlo hi hnar ngam ula, a bawihah lut suh u. Sawrkar pawhin theihtawp a chhuah dawn a, dan siamthat a tum a ni,” a ti.
Handholding hmangin khai chhuah tlak thalai, an bana kaia din chhuahtir an tum tih chief minister hian sawiin, dahkham ngai loin hma an lakna tur loan an la thei dawn a, sawrkar chu an dahkhamah a tang dawn tih a sawi. Loan an rulh that chuan a pung pawh an pe kir dawn, tiin, he scheme chhawr thei khawpin thalaite inbuatsaih turin a chah.
MZP president H Lalthianghlima chuan Zofest hi kum 2002 atanga hman tan niin, Zofa hmun hrang hranga awmte kan insuihkhawm zual zel theihna atana hman a ni tih a sawi a. Harsatna leh buaina tam tak karah ZOFEST hi hman thin niin, kumin Zofest na pawh harsatna tam tak paltlanga hman a ni tih a sawi.
Zo hnam inkhawmpui lian Zofest 2024 ah hian “Hrui khat vuanin” tih thupuiah hman a ni a. Mizoram leh a thenawm state leh rama Zohnahthlak hnam hrang bakah USA atangin palai an tel. Thawhlehni zan khan a hun khatna hman niin, MZP president hian Zofest meichher a det a ni. December 6 thleng a awh ang.