K. Hmingthankaia
-- Advertisement --
Khitiang lam thu khi inzirtira, beihpui thlak a hun leh tawh mang e, kei ve hian ka’n ziak ve leh chawr mai dawn emaw ni le? Mahse, mi sawi duh loh leh sawi peih loh sawitu nih fo pawh hi a zahthlak bawk si, tia ka lo inngaihtuah mek laiin, kum 2025 Chapchar Kut Organising Committee chuan thupui-ah an rawn nei ve ta chat mai a, inthlahrung lutuk lovin ka’n ziak ve leh tawp mai a nih hi.
Mahse, nun dan dik leh mawite, chet dan ha leh awngkam mawite, ngaihtuahna leh rilru dik leh hrisel inzirtirna lam thuziak reng reng hi, a mamawh ber leh a chhiar tur dik tak, kan ziah chhan ber dik tak, tunlai mihringte hian an chhiar ngai chuang si lova. Chuvang chuan ni tin kum tin kan ram chhiat tual tual nachhan chu, |halai chauh pawh ni lo, nu leh pa leh tu pawh hian lehkha kan chhiar duh ta tlat lo hi a ni. Chuvangin, nun dan ha leh, rilru dik leh hrisel neih inzirtirna lam hi chu, a chhiar hin mi tlem te, a hresa ngai bawkte chauh hriat tur ni lo hian, hengho mit leh beng thleng pha ngei tura tih a ngai tawh a ni. Kohhran tinah emaw, Vengchhung information center emaw, Vengchhung group emaw, social media eng pawh, a darh zau theihna tur apiang hman a ngai tawh a nih hi.
Aia upa zah tih chu Zonun ze mawi hian a keng tel nghal vek. Aia upa zah tih chauh a tawk lo, halai lam chauh a kawk deuh tlat. Kan vai hian ni tin kan nunho dan leh kan khawsak dante, kan chetvel dan zawng zawng hi siam hat leh siam thar, reform a ngai leh tawh em em a ni. Hetiang lam inzirtirna hi tunhma lam khan YMA bultumin kan lo nei tawh hin a, a sawt em em hin a ni.
Hetiang lam inzirtirna leh beihpui kan thlak vakna kha a rei leh deuh ta a. Khatih laia la piang lo leh, chhia leh ha la hre pha lote kha an lo sei lian mek a. Tin, chhungkaw fumfe lo leh kehchhia aanga lo sei lian leh, zirtirna leh zilhna dawng ngai lo an pung chak si.
Chu mai a ni lo, hmaichhana awngkam ha em em leh nem diai mai, rilrua mahni hlawkna tur chauh ngaihtuah leh hmasial lutuk avanga mite pawi sawi hlau tak anga lang hinte, mahse, helaia kan nun dan dik tak, Zonun ze mawi leh tlawmngaihte, kan rilru laimu ang pianpui ve hauh lo, helaia kan lo nunphung, kan social life entawn leh zir ve duh miah lote, hetiang lam nunphung leh zirtirna la hre ngai ngai reng reng lote chi tin hnam tin, hmun tin ram tin aanga ni tin lo lut mawlh mawlhte avang hian, kan Zonun ze mawi chu chim ralin a awm mek ta a nih hi. A va pawi em. Chuvangin, tunhma lam zawng aia nasaa hmalaka, beihpui thlak a hun leh tawh takzet a nih hi.
I chenna, i ram Mizoram hi uluk takin han en teh le. Hman lawka kan nunho dan nen chuan a va inang ta lo em! Kan tualzal nun hi a chhe tawh lutuk tih i hmu thei ang. A huhoa thil tihna leh khawsakna reng reng, bus emaw, bazar emaw, damdawi in emaw, khawi hmunah pawh hian, Tlawmngaihna leh Zonun ze mawi leh aia upa zah tihte kha a awm ta lo. Ni tin i chetvelna khawi hmunah emaw khan, thil ho te-ah emaw, tlema buaithlak deuhah emaw, tu emaw han puih lawk ngai i hmu ngai em? Chutiang hunah chuan tute nge lo pen chhuak hin? Hausak hmel deuh leh retheih deuh hmelte, inchei nalh deuh leh inchei vak lote, tute mai pawh chu, Vai ram ang chiahin, mahni hlawkna lo turah chuan kan ngawi tlat a, kan en liam lui tlat hin a nih tak hi tiraw. Tlemte tha han thawh hleka, midangte tana awlsamna leh thawvenna ni mai turahte, midangte buaina tihreh nana thu tlem han sawi mai theih rengahte hian, kan hlawkna lo turah chuan kan hrelo der tlat thin a. Chutiang huna chechhuak thinte chu Mizopa dik tak, Mizorama piang seilian ngei, upa lam zawk te zel an nih tak hi. Chutiang chu khawimaw lai hmun pakhatah i hmu a nih chuan, chutiang chu Zoram hmun tinah a thleng mek tih hria la, kan hnam pum pui awm dan, kan nun dan kan nunphung dik tak chu a ni mek tawh tih hria ang che. Ni tin chutiang chu nun dan phunga nei chho zelin, ni tin kan chhe zual zel a nih hi. A va rapthlak em!!
I ram hian chhan a ngai hranpa lo. A ram neitu, a chhunga cheng i HNAM hian chhan a ngai zawk a nih hi. I hnam i chhan loh chuan i ram chhan leh chuang tur a awm lo ang. I HNAM hian rilru hrisello lak aanga chhanchhuah a ngai tak zet tawh e. Tunah hian kan tlai chhe ep tawh a. Mahse, vawiin aanga nang leh kei hi kan harhchhuaha, tute emaw leh thil engemaw nghak kher lo leh ngaichang kher lova, tun aanga kan awmna hmun heuha bul kan an a, a sim hmasa leh ti hmasatu nih kan tum heuha, rilru hrisel kan put phawt chuan, Pathianin mal min sawm anga, hlim tak leh nuam ti takin kan ramah hian kan cheng za leh dawn nia .
Tuna kan hnam dinhmun hi chu a va lungchhiatthlak tak em!! Engtin nge maw kan tih tak ang le. YMA hian hmanhmawh tak leh na takin hma han la leh phawt mai teh u. Kan ziaawm leh mahna.