Zoram Thar Column: KHAWTHLANG RAM KOHHRAN TLUKCHHIATNA CHHANTE

Rev. Dr. Zaichhawna Hlawndo

Khawtlangh ram a bik takin Europe khawmualpui chu Krista leh a lalna Kristian ram ti a hriat thin an ni a. Kum tam tak chhung chu an ram nunphung engkim kha Kristianna nen a in zawm kan ti thei awm e. Khawvel ram pum deuhthaw ah rorelna chelhtu, Kumpinu lal ram tih mai thin British pawhin an innghahna bulpui chu Kristianna a ni. Kohhran leh ram rorelna pawh thuk takin Kristiannaah a innghat. Sakhua leh politics pawh sawi hran theih loh khawpin a inzawm tha thin.
Europe ram tam berte chu Kristian ram tia inchhal ngam an ni thin. Mahse tunah chuan Kristian ram tia inchhal duh pawh an awm meuh tawh lo a ni. Heti tak hian Europe ramah kohhran hi a tluchhe thei ang tih pawh hi an ngaihtuah bik awm lo ve. Tun tumah hian Europe rampum kohhran tlukchhiat dan leh tlukchhiat chhan kan ziak dawn lo va, keimahin a taka ngeia ka lo hmuh leh tawn hriat British ram chanchin kan thlur bing dawn a ni.
England ah hian PhD zir leh rawngbawlin kum 11 chhung ka awm a. Kristianna a tlahniam a, an hnungtawlh satliah mai a ni lova, Kristianna hian an ramah hian hmun a chang ta meuh lo a ni ber mai. Biak In tam takte chu sumdawnna hmun atana hralh te, sakhaw dang Mosolman, Hindu leh Sikh hoten an lei sak te, thiah leh luahtu awm loh avanga ruak tam tak te pawh a awm. Kohhran hmasa ho tuna la dingte pawhin thalai leh naupang inkhawm tur an nei tlem hle. Birmingham ah Kristian Biak In pahnih Mosolman te hnena an hralhah, Mosoman te inkhawmna hmunah thu ka sawi ve ve tawh a, a lungchhiatthlak hle. Manchester ah Biak In pakhat zu (beer) festival an hmannaah kan college zirlaite ka luhpui tawh bawk. Sumdawnna hmunah te, puipunna hmunah te leh sawrkar office ah te pawh Lal Isua Krista hming thianghlim te chu anchhe inlawh nan leh fiamthu thawh nan te an hmang. Chutiang tak chuan engatinge Kristianna chu a lo tluk chhiat tak mai, tu thiamloh nge? A chhan bulpui ber eng nge ni ang? tihte kan ziak dawn a ni.
Pakhatnaah chuan Kohhranin Thlarau Thianghlim an dah pawimawh lo:- Thuthlung Thar Kohhran innghahna chu Thlarau Thianghlim a ni a, chu Pathian Thlarau Thianghlim chu kohhranin a dah pawimawh tawk lo. Kohhran chakna leh a lo than duanna chhan chu Thlarau Thianghlim hnathawh harhna thlen vang a ni. Mahse Kohhranin chu Thlarau Thianghlim harhna chu vawn nun zel aiin, an rindan (doctrine), tihdan (practise) pathianna, pawl (denomination) ngaipawimawhna te a lian a. Thlarau Thianghlim harhna vawn nun zel an ngaihpawimawh lo. Kohhranin chu Thlarau Thianghlim tel lovin a kal zel a, zawi zawiin Pathian Thlarau Thianghlim a awm loh avangin kohhran chu a rovin a lo chau a, a tawpah phei chuan a lo thi ta ni berin a lang.
Pahnihnaah chuan Secularism dah pawimawhnain Kohhran a tidal. Secularism tih chu ‘Ram rorelna (Politics) sakhua tel lova kalpui emaw lak hran’ tihna a ni. Khawthlang ramah secularism – sakhua tel lova khawtlang leh ram inrelbawl duhna a lo lian a. Chu chuan politics leh kohhran a dah hrang tial tial a. Roreltute pawhin Kohhran an ngaipawimawh lo tial tial a, chu chuan mipui nun a nghawng chho ta zel a ni. Secularism hian sakhaw intluk tlanna leh sakhaw dangte pawh zalenna pek duhna te a rawn hring chho zel a. Kristian te chu nekchepin an awm zel a, sakhaw dangte an zalen a, kohhran pawh chu nekchep leh thlauhthlakin a lo awm ta zel a. Biak In inkhawm aiin vantlang nun, huau huau leh infiamna te ngaihpawimawhna a lo lian ta zel a. Chu chu kohhran tlukchhiatna hnar a lo ni ta a ni.
A pathumnaah chuan ‘Kohhran tih dan pathianna’ hi a ni. Kohhran ten tihdan pangngai an kalpui rei lutuk avangin kohhran a tluchhia. Kristianna a lo awm tan atanga an inkhawm dan te, an hla sak thin te, an thawhlawm khawn dan te, inkhawmpui an neih dan te a ngai deuh rengin an kalpui a. Khawvel changkang zel mil leh an thalai nun milin kohhran a insiam rem lo va, Biak In zai nana an hla sak leh an hmanrua te pawh khawvel hmasawn dan milin an kalpui duhlo. Bible thu tak leh Thlarau Thianghlim aiin kohhran tihdan hlui (tradition) kha an dah pawimawh zawk emaw tih mai tur a ni. Chuvang chuan thalai ten Biak In inkhawm an tui lova, zawi zawiin inkhawm an bansan a, a tawpah phei chuan thalai leh naupang inkhawm tur pawh an awm ta manglo a ni ber mai.
A palinaah chuan ‘Sakhaw intluk tlanna’ in Kohhran a pawlh dal. Khawthlang ramah zirna leh thiamna lo sang zelah ngaihdan thar te a lo piang zel a. Pathian thu zirna hmun (Theological college, seminar, university) a Pathian thu zirte chuan sakhaw dang pathian thute an zir tel a. Zirtirtute pawh an la a, zawi zawiin Pathian thu zirna hmun chu milem pathian biakna nen a lo inpawlh a. Sakhaw dangte pawhin Pathian an be ve tho, kan tum ram a inang vek alawm tihna te a lo piang zel a. British rama zirna in te chu Pathian nung nilo, milem pathian biak dan zirna hmunah an lo chang zo ta emaw tih mai tur a ni. Eng sakhua pawh a leng tur a lawm an ti zel a, a tawpah phei chuan Kristianna chu nekchep mai pawh ni lovin nek chhuahte a lo ni ta hial a ni.
A panganaah chuan ‘pawmzauna’ (liberalism) in Kohhran a eichhia. Hei hi a bul intanna chu Bible college leh university te an ni tlangpui. Bible zirtirna aiin mihring finna, duhdan leh ngaihdana kal duhna a lo lian a. Bible zirtirna kalh zawnga kal duhna lo lian zel chuan pastor leh kohhran rawngbawltute a nghawng a. A tawpah phei chuan Bible in a duhloh tuai leh patil te, mipat hmeichhiatna a fihlim lo mai nilo, mahni anpui kawp duhte thlenga rawngbawltu pastor pawm duhna te a lo awm ta zel a. Chu chuan kohhran thianghlimna a tibawlhhlawh a, mi tam takin kohhran an chhuahsan phah a ni.
A tawp berah chuan ‘Chanchintha hril an thlahthlam’ avangin Kohhran a tluchhia. Kan hriat angin British ram chu khawvela chanchintha hril nasa ber an ni hial ang. Hun engemawti lai atang khan ringlote veina leh khawvel ram danga chanchintha hril hna an thawhna chu nasa takin a tlahniam a. Kohhran hnapui ber Chanchintha hril an thlahthlam rah chu kohhran tlakhniam leh tlukchhiat kha a ni lo theilo. Chanchintha hriltu tur Kohhran pawh a tlukchhiat zel avangin anmahni chu vei let, chanchintha hrilh let an lo ngai ta hial a ni. Tunah hian Asia, Africa leh America khawmualpui lam atangin British ramah chanchintha hriltu, missionary tam tak tirhluh a lo ngai ta a ni.
Zofa Kristiante kan inenlet a ngai ta! Tuna khawthlang Kohhran an tluckchhiatna chhan kan sawite hi kan ram Kohhranah te hian a thleng ve mek em tihte ngun taka kan zir a ngai.
Tlai luatte hian pawina a nei; Tling thelh apiang pawi tih a zual ‘A tlai lu ta.’ an la ti ang, Nazaret Isua a kal liam ta’ kan tih loh nan.