ZORO-in an din champha lawm Border sut thiah a la ngai dawn – Lalthansanga

On May 21, 2026 1 0

ZO Re-Unification Organisation (ZORO) chuan Nilaini khan an din champha vawi 38-na an hmang a. Hmanpuitu minister Lalthansanga chuan Zofate chenhona turin international border sut thiah a la ngai dawn tih a sawi.
Zofate thendarha kan awm tawh phuarkhawmna turin ZORO a lo din tirh a hma latu a lo nih ve tawh dan Lalthansanga hian a sawi a. “Zohnahthlakte hi nuai 35 vel niin kan inchhut a, international border-in min then hrang hi sut thiah pawh a la ngai dawn,” a ti.
Ramri hung chungchangah, khawchhak lam atanga lokal zingah thil thalo tam tak a tel, tiin, central sawrkarin a ngaihmawh hle a, Home ministry atangin nawr pawh an nawr nasa hle tih a sawi. “Keini chuan kan unaute nena inkarah pal inhung hranna awm lo se ka duh em em laiin, Home ministry nawrna avang hian kan duh loh thil a thlen theih avangin, unau hmun hrana chengte pawh an khawsak dan leh eizawnnaah duhtuia fimkhur turin ka chah a ni,” a ti.
Kan Mizo nihna chu chhuang taka awmin, hnamdang tawng aiin kan tawng chu hnamdang lakah pawh kan rawlh zel zawk a ngai tih minister hian a sawi a. Kan rama lo zinte pawhin kan tawng an zir theihnan mahni tawng ngaihlu zel turin a chah bawk.
ZORO din champha lawmnaah hian resource person pahnih hman a ni a. Adviser to CM (Political) Lalmuanpuia Punte chuan “Zofate Dinchhuahna” tih thupui a sawi a. Prof J Doungel chuan “Ramri Hung” tih a sawi thung.
Lalmuanpuia Punte chuan, ZORO hi kum 1988-a Champhai-a a din tirh atang khan a dam khawchhuahna turin harsatna nasa tak a tawk chho a. Famta ZORO president Pu R Thangmawia chu Geneva-ah a zuk martar hial a, UNO lamin ZORO an hmelhriat ta hle tih a sawi.
“Zofate hmun hrang hranga insuihkhawm thupui hmanga ZORO a kal hi Lalpa’n mal a sawm a ni ngei ang. Burma leh Manipur, Bangladesh an rawn buai hnuah an inpui Mizoramah an rawn tlankhawm a. Mizo, Mizo nia inchhal lo hnam hlawm lian kan unaute Mizo nihliap hnuaiah rawn inhmuchhuakin inpawm an awm ta hlawm a, a dang pawh Mizo an nih tih rawn inpawm leh tur an awm mek” a ti.