ZORO-in FCAA ngaihtuah tha turin state sawrkar ngen
ZORO-in FCAA ngaihtuah
tha turin state sawrkar ngen
Zo Re-unification Organisation (ZORO) chuan Mizoram sawrkarin Forest Conservation (Amendment) Act 2023 a adopt chu ngaihtuah tha leh turin a ngen.
ZORO thuchhuak chuan, FCAA 2023 hi Supreme Court-a ngaihtuah lai mek, court pawhin thutlukna a la siam theih loh a ni, tiin, ‘Lo pawm ngawt hi a fel lo hle a, nakina Zofate lo awm zel tur hmakhua a tichhe thei dawn a ni. FCAA 2023 hian kan fundamental right a bawhchhiat avangin India Constitution Article 13 sawi anga he Parliamentary Act hi tihtawp mai emaw India Constitution-in dikna chanvo min pek anga herrem chi niin a lang,’ a ti.
FCAA 2023 hian sawrkar laipui thuneihna sang tak a pe a, Section 2 siamthat hian ram leilung fate tan harsatna namen lo a thlen tih ZORO hian a sawi a. FCAA 2023-in ngaihhnathiam (exempt) tura a dahah hian international boundary atanga km.100 chhung chu sawrkar laipuiin a duh anga a hman theih turin state sawrkar leh village council/ gram sabha, NGO-te rawn lo pawha a hman theih turin thuneihna a la a, forest clearance lak buai ngai loin hma a la thei tih a sawi.
‘FCAA 2023 hian India Constitution Article 371G-a kan inhumhimna tura dan min pek a kalh fai vek a, chanvo min pek a rapbet vek a, indigenous peoples chanvo chhuhsakna a ni. FCAA hi Parliament-in a adopt a ni a, Article 371G erawh India Constitution a ni. Democracy-ah chuan constitution a lal zawk a, thu a nei zawk,’ a ti.
FCAA 2023 hian India Constitution Article 244 a kalh tih sawiin, he article hmanga siam Fifth leh Sixth Schedule-in autonomy leh right a siamsak ADC, UT leh state chanvo a chhuhsak bakah Indian Constitution Article 19 a bawhchhia a, he article-in chanvo min pek Freedom of Residence and Settlement, Freedom of Occupation, Trade, Profession a bawhchhia tih ZORO hian a sawi a ni.
‘India Constitution Article 21-in chanvo min pek- zalen taka thuneihna min pek chu a nek chep a, tribal-te ramngawa an eizawnna tur a dang ping. Ramngaw an duh anga an thiah theih avangin weather leh climate thleng pawi nasa tak a thlen thei a; environment nasa takin a tichhe thei tih a sawi bawk.
Tualto hnamte tana inhumhimna tur UN Declaration on the Rights of Indigenous Peoples Articles 13, 15(2), 17(2), 21(1), 24(1), leh 25 chu FCAA 2023 hian nasa takin a bawhchhia tih a sawi a ni.
‘ZORO chuan kan ram leh hnam tan a him lo nia kan hriat avangin he Act hi kan pawm thei loa, Mizoram sawrkar hian central lam beng a thlen hma ngeia ngaihtuah tha leh tur leh a tul anga Special Assembly hial pawh koa ennawn turin kan ngen a ni,’ a ti.