ZORO-in FMR hlih kengkawh tura tihna sawrkar lehkha an hal

Zo Reunification Organisation (ZORO) chuan Free Movement Regime (FMR) hlih leh ramri hung tum duhloh lantirna chu Nilaini khan Mizoram hmun hrang hrangah an huaihawt a. Aizawlah chuan FMR hlip a, kengkawh tura tihna India sawrkar leh Mizoram sawrkar thupek copy hal a ni. ZORO vice president Rohmingthanga Kawlni chuan sawrkar laipuiin zalen taka kan unaute nena kan inkalpawh theih dan hlip a, a hlihna order a siam a, Krismas present niawm taka a rawn thawn chu ZORO chuan lungchhiatthlak a ti a. Chumi ruala Mizoram sawrkarin hmanhmawh taka hman theih tura a buaipui rum rum chu ZORO chuan a hrethiam loa, an lungawi lo hle tih a sawi.
ZORO general secretary L Ramdinliana Renthlei pawhin Free Movement Regime (FMR) thiah leh ramri hung a rik tirh khan Zofaten kan helh hle a. ZORO pawhin theihtawpin a dodal a. NGO hrang hrang leh political party-in an dodal a, Mizoram State Legislative Assembly Session-ah pawh duhlohna resolution lungrual taka pass a ni tih a sawi.
“A lan danah chuan Zofa zawng zawngin kan duh lo vek a. Heti khawpa Zofaten kan duh lo chunga India sawrkarin a ti lui a nih chuan, kan ramah eng harsatna pawh thleng se, mawh kan phur dawn lo. FMR hlih leh ramri hung hi ZORO chuan a dodal zel dawn a, na zawka hma la turin ruahmanna siam a ni dawn,” a ti. ZORO hmalakna thlawp zel turin mipui an sawm tih a sawi a ni.
ZORO secretary Lalnunfela Chawngthu chuan Zofa tlang hrang hranga awmte zalen takin mahni chenna theuhah kan awm thei a. Nimahse British sawrkarin min luhchhuah tak atang khan kan buai zo ta a, vawiinah hetiang hun hman a ngai ta hi a lungchhiat thlak hle tih a sawi. FRM hlip a, ramri hung chu kan dikna chanvo rahbehna leh chhuhsakna a ni a, dodal zel tur a ni tih a sawi.
ZORO-in FMR hlih leh ramri hung duhloh lantirnaah hian sawm an nih angin political party atang pawhin thu an sawi a. MPCC aiawhin general secretary Joseph Lalhimpuia, MNF aiawhin adviser TJ Lalnuntluanga leh ZPM aiawhin PAC member Ngursailova Sailo ten an sawi. Hetiang hun hi Champhai, Serchhip, Lunglei, Kolasib, Mimbung, Vaphai leh Tengnopal (Manipur) ah te hman a ni bawk.