ZORO-in Indigenous Day hmang

August 9 kha International Day of the World Indigenous Day (Indigenous Day) a ni a. Tualto Hnamte Ni hi kum 1994 atang khan UNO chuan a hmang tan a. Mizoramah pawh ZORO bultumin kumtin hman thin a ni.
Kumin hian ZORO Divisional Hqrs Lunglei bultumin Lungleia hman a ni a. Hmanpuitu Assembly speaker Lalbiakzama chuan, hnam lian leh chak zawkten an awpbeh tualto hnamte chhanchhuah an nih theih nan UN Declaration on the right of Indigenous Peoples chu 2007 September 13 khan siam a ni a. He thupuan hi tualto hnamten hman tangkai thiam a ngai, tiin, “Kan ram china kan thuneihna leh hnamzia humhalhsak kan nihna, mimal leh hnam anga kan dinchhuahna tura kan dikna chanvo hi mipuiin ngaihven reng a ngai,” a ti.
Tun maiah chuan mahniin ro inrel lo mah ila, khawvel sawrkar ramri khamin min daidanna karah pawh, tisa leh thinlung inpumkhat a, dam leh tlang khatah, thih leh ruam khatah kan ti tlat chuan, khawvela hnam zahawm kan ni zel dawn tih Lalbiakzama hian sawiin, “Zofate kan inpumkhatna leh dinchhuahna a lo nih theihna turin, World Indigenous Day-ah hian Zofa zawng zawng duhsakna ka hlan a ni,” a ti.
Hmanpuitu dang, Lunglei High Powered Committee vice chairman V Malsawmtluanga, MLA bakah ZORO president R Sangkawi leh vice president Lalmuanpuia Punte, MLA te pawhin thu an sawi a. Myanmara Zohnahthlak MP-te, Bangladesh palai leh Tripura palai atangin thu an sawi bawk.

World Indigenous Day-a Zofa kalkhawmte resolution pawm:
Zofa – India, Myanmar leh Bangladesh sawrkar awp hnuaia chengte hi hnam khat, thlahtu thuhmun, thisena inzawm, tawng khat hmang (tawng khat, chibil tawng hrang hrang nei) nunphung thuhmun, serh leh sang inkhawih pawlh, beiseina hruikhat vuana ‘Dam leh tlang khatah, thih leh ruam khatah,’ ti thin unau dik tak kan ni.
British-in an ram awp remchan dan ang Zofate luah ram an then hrang a, mipui min then darh a, kan dikna chanvo min tih chhiatsak hi kan tan anchhia a ni. Zo Re-unification Organisation (ZORO) in Zofa, thendarha awm tawh, kan dikna chanvo nei leta insuihkhawm leh tura hma an la hi a dik kan tiin kan pawm a, tharum thawh loa, dikna hmachhuana insuihkhawm tura beihna hi tha kan tiin, kan thawp a ni.
Zofate insuihkhawm lehna tura ZORO-in a beihna hi India, Myanmar leh Bangladesh sawrkar hnuaia awm Zofa zawng zawngin thlawp tlat a, kan insuihkhawmna’na thawk tlang turin kan ngen a ni.