ZORO-in ramri hung leh FMR thiah duh lohna lantir dawn

Zo Reunification Organisation chuan India leh Burma inrina daidan tumna leh zalen taka inkalpawhna theihna – Free Movement Regime thiah tum duh lohna chu ramri bulah kumin May 16 hian an lantir dawn.
ZORO thuchhuak chuan, India sawrkarin India leh Burma inrina hung a tum leh FMR thiah a tum chu unau thlah khat min then hran a tumna leh Zofate min nekchep a tumna niah a ngai a, tha lo a tiin, a duh lo hle tih a sawi.
India leh Burma ramri hung tum a duh loh zia lan tir nan leh FMR thiah tum a duh loh zia lantir nan Burma nena inrina bulah May 16 hian ‘peaceful rally’ neih tum a ni tih sawiin, Mizoram mipui leh Burma ram chhunga Zofate a tam thei ang ber tel turin a sawm tih a sawi.
‘ZORO in Burma leh India ramri hrula ramri hung duh lohna leh Free Movement Regime thiah tum duh lohna, peaceful rally a neih rual hian India leh Burma ramri hrula awm khua ten mahni remchan dan anga lo huaihawt ve turin ramri hrula khaw tinte kan ngen a ni,’ an thuchhuak chuan a ti.